卖花赞花香乃人之常情,不过西环呢间新店够胆喺门口写住「踏嚐百家 泰国第一」咁架势,就当然要由开饭仔嚟问个仔细!原来老板真系定期去泰国取经,学到一身武功返嚟自己开店,由熬煮汤底到拣食材都一丝不苟。而家仲做紧新张优惠试食价,实行薄利多销益街坊。
位於香港大学港铁站附近嘅666泰船面店如其名主打七款泰式船面,由於船面系一种喺泰国水上市场卖嘅小食,分量自然细得多。嚟到香港怕大家唔习惯,所以分量调整过,女士大概食两碗就够饱,男士就可以再食多一碗或者选择嗌小食。
招牌猪肉船面($20)主要材料有猪肉片、猪润同腩肉,要特别一讃腩肉入味而有咬口,无坊间一般腩肉过腍嘅缺点。配埋店家秘制嘅香口脆脆同爽脆白通菜,口感层次丰富。面底可以拣金边粉、米粉、河粉、粉丝或者黄面,五款都系特别从由泰国入口。
而另一推介系牛肉船面($20),主要材料有牛丸、肥牛同牛腩。略嫌肥牛片肥膏较多,不过牛丸口感弹牙,而且牛腩软腍富牛肉香,补返数啦。
不过其实船面灵魂在於汤底,呢间小店每晚只会准备两大煲汤底隔日卖,皆因真系要落足时间心机去熬。老板同开饭仔讲,单系将要用到嘅草药切碎再用唔同温度炒制嘅准备功夫,都已经要用超过一个钟!草药中除咗甘草同八角等较为常见嘅之外,仲有两款系香港搵唔到,需要特别喺泰国入口嘅神秘草药。而呢碗深啡色相当浓稠嘅汤底系用咗系草药再加猪骨、酱料、椰水等材料熬煮,所以饮落喺浓郁咸香嘅味道当中,又带淡淡嘅香料同草药味。
更多【新店直击】: |
除咗船面之外,餐厅亦有饭、小食、串烧、汤同饮品供应。泰式海南鸡饭($25)一样系细分量。鸡皮唔肥腻兼有少少爽韧,鸡肉亦够嫩滑有鸡味。点埋师傅秘制嘅鸡饭酱,入口先酸後辣,有香味又开胃。鸡饭亦系加入香茅、姜、班兰叶等香料,食落少一份油腻,多一份独特诱人香气。
老板仲公开埋Secret Menu:其实仲有另一款酱汁,就系特别去泰国买返嚟,水门知名海南鸡饭店广兴出产嘅鸡肉饭酱!酱汁味道更辣,最啱无辣不欢,又或者挂住水门鸡饭风味嘅你。
钟意香口小食嘅话唔好错过佢地嘅泰式炸虾饼($30),一份五件,件件手打咬落够哂弹牙,皮香脆而厚度适中,绝对唔洗惊会食到成口粉。虾饼本身已经有少少调味,点埋酸辣酱更加惹味香口。
食咗咁多香口嘢不如饮返个椰青($32)啦,原个椰青即叫即开,难得饮落唔酸之余仲系自然清甜,饮完可以挖埋椰肉嚟食。原来亦系多得老板试匀哂唔同供应商嘅椰青,最後搵到一间满意嘅。
餐厅开业到而家已经得到唔少街坊同附近大学生嘅欢心,除咗因为有新张优惠够抵食之外,亦因为食物有泰国特色。老板亦表示希望先稳定出品,试业期间会继续以优惠价吸引大家嚟试食赚口碑。稳定後将会推出更多食品,好似青咖喱面、冬阴功汤、泰式甜品等等。暂时未知优惠期几时会完,所以想试嘅话开饭仔当然系建议越快越好!
666泰船面
西环德辅道西366号中亚大楼地舖
*文中所示价钱为访问当日的新张优惠价,最後价钱以餐厅餐牌出示为准
文、相、片:Cathy