提到喺香港食蛋包飯，相信唔少饕客都會諗起位於海港城嘅niji bistro，最近佢地就去到荔枝角開副線niji kitchen，主打健康定食。蛋包飯有七款唔同傳統同創新口味選擇，仲有自家製甜品、醃菜等供應。而且仲幫到聾人就業！
 

niji kitchen特別從日本訂製蛋包飯專用鍋，雞蛋煎嘅時候就可以更均勻受熱，輕易煮出皮薄蛋滑嘅蛋包飯。而食材選擇亦非常考究，好似咖喱粉選用日本直送，無任何味精或動物油，味道比一般咖喱清爽，而且食完唔會容易覺得口渴。
 

7款口味健康蛋包飯

日式咖喱牛肉蛋包飯（單點$64，套餐$88）

用加入美國牛肉、甘筍、洋蔥、西芹等加上日本直送咖喱粉慢火燘煮，咖喱香十足味道帶微辣。而蕃茄炒飯用嘅係珍珠米，口感軟滑但略嫌未夠粒粒分明。蛋皮相當薄，而頂部仲留有少少蛋汁。
 

明太子忌廉汁大蝦蛋包飯（單點$68，套餐$92）

除咗傳統咖喱之外亦有創意口味，首推呢款喺日本忌廉汁當中加入明太子嘅明太子忌廉汁大蝦蛋包飯，搭配帶少少酸嘅蕃茄炒飯味道層次分明討好。
 

赤味噌燴牛肉蛋包飯（單點$64，套餐$88）

鍾意食香口嘢嘅朋友仲有呢道赤味噌選擇，一上枱就聞到濃郁香味，同牛肉可以話係最佳配搭之一。
 

忌廉汁雜菜蛋包飯（單點$48，套餐$72）

蛋包飯亦有Go Green版！呢款忌廉汁雜菜蛋包飯就適合蛋奶素食人士享用，配料包括秋葵、菇菌、椰菜，同甘筍等蔬菜，色彩繽紛又健康。
 

牛肉漢堡扒蛋包飯伴日式咖喱汁（單點$64，套餐$88）

茄汁雞肉蛋包飯（單點$54，套餐$78）

吉列豬扒蛋包飯伴日式咖喱汁（單點$64，套餐$88）

3款自家製甜品

抺茶忌廉、草莓及草莓汁脆焗蛋白（$48）

餐廳亦特別設計咗三款唔同口味嘅自家製脆焗蛋白畀大家滿足埋甜品胃。賣相最吸引嘅就要數到呢款以抹茶配搭士多啤梨嘅口味，加入日本抹茶粉同比利時白朱古力，上面再以士多啤梨片同士多啤梨醬點綴，記得要相機食先呀。
 

鮮忌廉及鮮熱情果脆焗蛋白（$38）

鮮忌廉、雜莓及紅莓汁脆焗蛋白（$45）

另外仲有兩款以鮮果為主嘅選擇，一款配以清香嘅熱情果醬，另一款就有雜莓、紅莓汁同君度甜酒，同外脆內軟嘅脆焗蛋白一樣咁夾。
 

3大細節加分位

自家製醃菜

餐廳喺唔少細節上都做得相當有心思，值得加分。首先係用醋同唔同顏色蔬果醃製嘅醃菜，特別在會加入木魚粉提鮮，而且蔬果亦會按時節不定期更換。最重要嘅係免費無限添加，無論當開胃小食，或者同蛋包飯一齊食都得。
 

一保堂賀之茶（套餐免費，單點$15）

而蛋包飯套餐當中，除咗雞肉雜菜湯之外仲包一杯飲品，推介大家試下呢杯一保堂賀之茶，嚟自日本京都有近三百年歷史嘅一保堂茶舖，烘焙香味十足，濃而不苦，最啱飯後解膩。
 

最後，餐廳當中有七成員工都係聾人，會為佢地提供廚師培訓同就業機會，幫助聾健共融。而且每張訂單餐廳都會捐贈 $1畀慈善機構，醫肚同時回饋社會！喺附近返工嘅打工仔女，或者帶小朋友嚟商場玩嘅家長們，以後就多個飯堂選擇喇。
 

niji kitchen
荔枝角長義街9號D2 Place二期3樓310號舖

文、相、片：Cathy