花甲蟹泰式海鲜锅+火焰鸡煲 九龙城七十年代旧香港风味火锅馆(有片)
2019-03-19

方格阶砖地板、吊扇灯架、牌匾、旧式汽水雪柜同埋卡位旁嘅旧信箱,都令人彷佛置身於六、七十年代嘅香港。讲紧嘅唔系咩博物馆,而系九龙城新开嘅火锅店。呢间火锅店装修以旧香港风为主题,食物方面除咗怀旧点心同小食,仲有唔少新口味火锅汤底同点心新食法,样样都真材实料㗎!



招牌花甲蟹海鲜锅(泰汤)($388)

汤底可以话系打边炉嘅灵魂,呢度就有供应六款自家制汤底,当中以招牌花甲蟹海鲜锅(泰汤)最受欢迎。汤底采用花甲、虾、蟹等海鲜,再配上秘制酸辣汤、泰式海鲜酱、姜、香茅及芫茜等配料熬煮三小时而成。味道似冬荫公咁酸酸辣辣,另带有浓郁海鲜甜味,够晒开胃!




火焰鸡锅($168)

重口味人士就要食鸡煲啦,呢个鸡煲除咗有Fire show 睇外,店主私心推介要加啲吸味配料落去一齐食,如加入黑栢叶($68)、鹅肠($78)、卤大肠($68)同埋特色虾米肠粉($38)落去炒香,鸡锅嘅味道渗晒入每一种食材到,好惹味~



鹌鹑蛋烧卖($48)、特色虾米肠粉($38)

火锅店仲创立咗新嘅点心食法,就系将点心当火锅配料,鹌鹑蛋烧卖而家已经少见,用嚟打埋边炉真系买少见少,质感扎实弹牙,估唔到又几夹。虾米肠粉口感似河粉,有淡淡虾米香。温馨一提肠粉比较易散,放落锅渌一渌就食得啦~



日本飞驒牛(细$328/大$498)

打边炉又点少得牛肉,日本飞驒牛无论脂肪比例、色、香同纹理都系最高评级,靓到可以当刺身食添啊。记得渌到微微粉红色就拎返上嚟啦,果然系入口即溶~



鹅肝墨鱼丸($58半份/$98一份)、火爆牛丸($48半份/$88一份)、梅菜猪肉丸($43半份/$78一份)、虾丸($48半份/$88一份)、鲮鱼丸($38半份/$68一份)

所有丸类全部都系人手自家制,好弹牙。虾丸同鲮鱼丸以新鲜虾及鲮鱼肉制成,火爆牛丸食完真系有火辣辣嘅感觉,食得辣要挑战吓!


火锅汤滚糖不甩($48)

餐厅内最具特色嘅,呢味汤滚糖不甩一定系其中之一。将糖不甩放落汤底灼熟,糖不甩有阵阵汤香,沾埋花生碎一齐食,既有汤底咸香,又有甜甜嘅花生味,原来糖不甩可以咁食!


怀旧绿宝橙汁($13)

七十年代无人不晓嘅绿宝橙汁呢度都有得饮呀喂!店主特意引入泰国版嘅绿宝橙汁,为嘅就系希望畀港人饮返童年嘅味道。


同场加映!餐厅内仲有个小角落卖龙须糖、芝麻糖、叮叮糖同糖葱饼等怀旧小食,真系咩回忆都返晒嚟~


九龙城同捞同煲火锅

地址: 九龙城打鼓岭道70-72号地舖





文、相、片:  Yanica


关键字
九龙城
火锅
怀旧
点心
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】便利店寻宝 每周新品速报
2019-11-29
【2019圣诞】早鸟优惠! 圣诞自助餐推介
1天前
【2019圣诞】年尾叉电 圣诞下午茶集合推介
2019-11-19
秋风起!5间大闸蟹放题食店集合
2019-11-19
【2019圣诞】约会之选 圣诞市集推介
4天前