聯合國特色熱狗 1987 Hot Dog
(Photos by ronronyip)
以唔同國家風味熱狗做主題嘅小店，其中最爆嘅一定係英式代表爆醬班尼迪熱狗，同平時食開嘅Egg benedict差唔多，但就將底下塊麵包變成熱狗包。一咬開水煮蛋就會爆開，連埋溝咗少少醋嘅荷蘭醬，真係有爆醬效果！另外亦有法國油鴨肉熱狗、泰式酸辣蝦熱狗同意大利辣肉醬芝士熱狗，成班Friend嚟真係可以開個聯合國熱狗Party！
邪惡拉芝熱狗 ICONIC H 特色熱狗店
(Photos by ichelleszeto & fattiefoodiee)
正所謂有得揀先至係老闆，呢間特色熱狗店就從腸到Topping同醬都超多選擇任你揀，有選擇恐懼症嘅可以揀佢地嘅特別熱狗，例如大鰻狗或者頂級法國鴨肝狗。但呢度最受歡迎嘅，其實係普通熱狗再加熱熔芝士Topping，芝士分量夠多，用叉拉芝又得，咬住拉芝亦得，得咗。仲嫌唔夠邪惡嘅話可以再加黑松露蛋、煙肉碎或者炒雜菌，醬汁揀藍芝士醬，邪惡到一個點。
香港人嘅漢堡包 時新快餐店
(Photos by natfoodiary_ & Summerpatty)
提到港式漢堡不得不提嘅代表，唔單止裝修，連食物都仲保持住七八十年代港式快餐店嘅風味。漢堡扒以新鮮牛肉打出嚟，比起美食連鎖快餐店細塊啲但厚身啲、鬆軟啲又多汁啲。可以加蕃茄、咖哩、黑椒其中一款醬汁，其實唔揀嘅話原本嘅沙律汁酸酸甜甜咁已經夠開胃。二十幾蚊一個漢堡包性價比夠高，而且嗰份香港情懷唔可以輕易用錢嚟衡量。
足料海鮮漢堡 Seafood Stand
(Photos by 山區麵包王)
呢間睇個名就知以海鮮為賣點，其實佢地嘅漢堡包亦有相當水準。龍蝦司令堡有兩隻大大粒帶子同差唔多半隻彈牙龍蝦肉，都算幾抵食。另外軟殼蟹漢堡就有炸得香口但唔油膩嘅軟殼蟹，配蝦肉、番茄、生菜等，一樣足料。唔食海鮮嘅仲有比較少見嘅香辣羊仔柳漢堡，羊仔柳有少少羶而肉質軟腍，醬汁辣辣地又同羊肉夾到，可以一試。
鵝肝和牛Double滋味漢堡 Cafe Charm's
(Photos by Ladyteex & 糖小妹)
歐陸裝修嘅西式Cafe，輕食當中嘅手工和牛漢堡非常出色，牛扒係手打澳洲和牛，肉味濃郁而且多肉汁，加埋燒菠蘿就更有Juicy效果。仲想邪惡啲？可以加一塊甚至兩塊香煎鵝肝！油脂甘香嘅鵝肝同塊漢堡扒差唔多厚，一啖咬落兩種唔同口感嘅滋味滿足Double up，唔想太邪惡嘅亦可以加生菜、蜂蜜洋蔥、炒野菌、菠蘿、薯餅等材料。儀態？唔理住啦。
熱狗漢堡一站式KO 全球美食
(Photos by 十五仔 & 鄭廿一)
舖仔細細所以唔少人都會嚟呢度買外賣，有Pizza、意粉、三文治，亦同時有熱狗同漢堡供應。熱狗有幾款唔同口味，焗香草芝士美味熱狗就搭清新香草醬，相反美式皇牌熱狗就加咗煙肉同磨菇碎，如果係食肉獸不妨點加肉醬嘅熱狗！手打漢堡配搭係最基本嘅漢堡扒、番茄、芝士同沙律醬，勝在手打漢堡扒咬落啖啖肉，抵食過連鎖快餐店啦。
隨時接收最新資訊
讚好OpenRice專頁！
