素食朋友，或者對蛋、奶等有敏感嘅朋友都可以食雪糕？係呀，純素雪糕咪得囉。呢間純素雪糕店之前淨係開喺Kong U度，最近喺中環摩天輪附近開新店，可以選擇嘅雪糕口味仲有成10幾款咁多添~~~
呢個品牌出嘅天然純素雪糕，冇奶、冇蛋、冇大豆，冇膽固醇、無添加人造味精、食用色素同防腐劑等等，咁點整？原來係用椰漿同椰糖混製，再加入水果、果醬而成，唔怪得食落嗰陣，會有淡淡嘅椰香味滲出啦。同埋亦因為冇落色素嘅關係，啲雪糕望落去隻隻都差唔多色，都係啡啡地咁，係椰糖嘅顏色嚟呀。
南瓜朱古力醬味
薑味
中環呢間分店，有杯裝、cone裝或者全素雪糕三文治，味道就有印度拉茶、鹽味焦糖、夏威夷果仁焦糖之類，另外仲有兩隻冬日系列口味：薑味同南瓜朱古力醬。薑味嗰隻幾有驚喜呀，薑味香而不辣，細心啲留意下，仲會見到一條條幼幼der薑絲添。
Happy Cow
地址：中環民光街3號攤位
文、相：Kar