精选原片茶叶+新鲜时令水果 中环新开花果茶室(有片)
2018-06-19

香港嘅夏天点少得一杯清新茶饮?中环呢间新开嘅饮品店主打选用优质原片茶叶,保留茶嘅清香而去除涩味,想贪心啲嘅话可以选择唔同时令水果同芝士奶盖,配搭出属於你嘅消暑滋味。
 


位於中环摆花街嘅Tea Library旨在提供一个好似图书馆咁宁静舒适嘅环境,畀大家停落嚟好好品茶。而店名另一个意思系希望做到好似一个茶嘅图书馆,为大家介绍唔同茶嘅特色。4款主打中式茶嚟自中国福建同云南,用经过精挑细选嘅原片茶叶,茶香同余韵都各有特色。而且100%采用新鲜水果,而唔系用果酱或者糖浆打成,自然香甜。
 


荔枝高山乌龙($39)

高山乌龙选用春收手采茶叶,低温烘焙加上氧化程度(60-70%)比坊间一般乌龙茶叶(80%)低,减低丹宁含量,入口口感柔滑、茶香突出。荔枝嘅甜香同乌龙嘅回甘亦相当夹。
 


白桃极品铁观音($43)

粉橙色卖相非常吸引,选用澳洲或日本等地当造白桃,打成果汁再加入铁观音茶,甜味自然唔腻。铁观音茶只选春秋二造,闻落有少少兰花香味,回甘清新而悠长。另一水果推介系芝士草莓极品铁观音($48),除咗因为时令士多啤梨同铁观音夹之外,饮到一半将融咗嘅奶盖搞匀饮,会有士多啤梨奶嘅感觉!
 


芝士黑朱古力珍藏普洱($48)

普洱选用云南珍藏25年自然发酵茶叶,特别从香港一间老字号茶庄入货,有一阵特别嘅陈香,清润解腻,而且完全无任何苦涩味。配搭黑朱古力最易入口,用嘅系法国Valrhona无糖朱古力粉,可可香味浓郁。加上芝士奶盖嘅轻微咸味同奶香带起朱古力自然甜味,非常讨好。如果想饮普洱味道重啲嘅,可以拣返无奶盖嘅版本唷。
 

更多【新店直击】:
1. 拉面店转型开居酒屋 抵食北海道家庭乡土料理
2. 荃湾发现日本点菜机! 自助柯打黑蒜油、樱花虾拉面
3. 由台北开到香港 铜锣湾玩味楼上Cafe

 

芝士火龙果银毫茉莉龙珠($48)

紫红色卖相嚟自红肉火龙果,果肉无完全打碎,饮落口感最丰富。入口先食到火龙果嘅微甜,之後脷底回有一阵银毫茉莉嘅持久嘅回甘,带少少花香同甜味,层次分明。银毫茉莉龙珠嘅龙珠并唔系珍珠奶茶嘅珍珠,而系指将银毫、即系带白色茸毛嘅初生芽叶同其他春芽手卷成球型,之後仲会用茉莉花作六次窨香㗎。
 


就算平时比较少饮茶嘅朋友都可以一试,一嚟佢地选用原片优质茶叶,唔会有平时用茶碎冲茶嘅苦涩味同嚡口感。二嚟配搭嘅水果同奶盖都有用心,例如芒果只会用纤维比较少嘅泰国水仙或者金水仙品种,苹果用嘅系糖度达13度日本青森县苹果。奶盖亦系用Cream Cheese、牛奶等打成,而唔系用奶盖粉,略嫌口感唔够Fuffy,但芝士香十足,建议大家最好系半个钟之内饮完呀。
 






Tea Library
中环摆花街24号地舖




文、相、片:Cathy

关键字
中环
高山乌龙
铁观音
珍藏普洱
银毫茉莉龙珠
水果茶
Tea Library
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2天前
全城抗炎! 5间酒店自助餐转型 任点任食海鲜/主食/甜品 变阵保卫生
2020-03-17
【特约分享】超抵外卖陪你抗疫 即睇将军澳饮食地图!
2020-03-10
【随时更新】最後倒数!即将结业的老字号及人气小店
5天前
尖咀Omakase 独创三文鱼子海胆日式糯米饭 新开业优惠 第2位半价
2020-03-19