西灣河老字號甜品明記，近呢幾個月分別喺銅鑼灣同天后都開咗新分店，走年輕嘅路線，多咗啲IG-able嘅新menu。喺嚟緊嘅weekend開始，仲會推出一系列嘅紫薯甜品，即刻同大家率先試過！

三款紫薯甜品包括有紫薯窩夫、紫薯布甸同紫薯心太軟。新店而家都有窩夫食，有半份同一份揀，一份嘅就有一整件格仔窩夫再加兩球反轉雪糕筒，另有珍珠同小丸子伴碟，望落係幾豐富下。紫薯窩夫用紫薯漿加麵粉、蛋等調製，邊邊微脆，中間鬆軟得嚟幾有咬口，有啲似麻糬，搭埋淋上紫薯汁、煙煙韌韌嘅丸子，紫薯控應該滿足咗。

呢個紫薯布甸就咁望落，未必睇得出佢嘅特別之處，但嗶起第一匙食就知，分咗兩層啊！頂頂嗰層深色啲嘅係紫薯蓉嚟，食落沙沙地嘅感覺，下面就係滑捋捋嘅紫薯布甸，兩種口感令到紫薯味較為突出。淋花奶當然可以，但如果想再勁啲紫薯嘅，可以改加紫薯醬！

至於紫薯心太軟，係就係細件咗少少，但加埋雪糕同小丸子，都有返咁上下飽度呀。切開流出紫薯漿嗰下最治癒，而且，相比起淋上去嘅紫薯汁，流出嚟嘅漿，味道較香濃。

又，即使你只係陪紫薯控嘅朋友嚟潮聖，呢度都仲有好多夏日鮮果特飲，用新鮮生果調製嘅西瓜沙冰呀、香蕉沙冰呀咁，透心涼之餘仲可以啜到一粒粒果肉。

明記甜品
銅鑼灣店地址：銅鑼灣耀華街12號地舖
天后店地址：天后清風街4號福華大廈地舖

文、相：Kar