接近年尾，有幾間酒店都推出唔同主題嘅下午茶餐飲優惠，好似北海道主題呀、榴槤呀等等，有自助餐亦有套餐，實行要大家食得盡興。睇完揀啱邊間嘅，就約埋班friend子一齊過返個甜蜜下午啦。
北海道風情 Park café 
呢間酒店嘅下午茶以北海道美食作主題，想下buffet又得，tea set都得。係人都知北海道出名牛奶香滑濃郁，所以佢哋就選用3.6牛乳製成多款甜品，好似牛乳流心芝士麵包布甸同北海道十勝紅豆綠茶布甸。而下午茶則有日本白桃慕絲蛋糕、北海道煉奶木糠布甸等共11款美食，大家可以嚐盡北海道各種滋味喇！
「戀上北海道」下午茶自助餐
「北海道の味」下午茶
「戀上北海道」下午茶自助餐
供應日期: 即日起至11月30 日 (15:00 – 17:00)
價錢: 星期五 成人$218、小童$188; 星期六、日及公眾假期 成人$238、小童$208
「北海道の味」下午茶
供應日期: 即日起至11月30 日 (15:00 – 17:00)
價錢: 星期一至五 成人1位 $178、2位$298; 星期六、日及公眾假期 成人1位$198、2位$338
任食甜蜜雪糕下午茶 帝景軒
雪糕同下午茶永遠都係女士最愛，而呢間酒店就同Häagen-Dazs™合作推出「甜蜜奇緣下午茶」，以全新雪糕杏仁脆筒系列為靈感，推出多款鹹甜美點。當中有呍呢嗱焦糖杏仁、抹茶同朱古力杏仁三款口味。
最有驚喜就係脆筒竟然可以用嚟做鹹點，好似辣肉醬牛油果筒咁，就係將自家製辣肉醬加入迷你脆筒，再配上牛油果醬。
榴槤控必食 City Café
身為榴槤控嘅你，嚟呢度食下午茶自助餐就唔使驚畀人話榴槤臭，叫你拎埋嚿榴槤走開喇！酒店而家以榴槤同水蜜桃為主題，推出多款夏日大熱甜品，再配埋五十幾款多國美食，包你食過番尋味。最值得推介就係即叫即製榴槤梳乎厘同榴槤香蘭葉蛋糕，後者外觀整到同真榴槤差唔多，好盞鬼。
榴槤‧水蜜桃‧下午茶自助餐
供應日期: 即日起至9月30 日 (15:30 – 17:30)
價錢: 星期六、日及公眾假期 成人$208、小童$148
有無諗過食嘢都可以幫到人呢？尖沙咀呢間酒店響應嚟緊十月嘅國際乳癌關注月，而推出咗粉紅主題下午茶套餐，另外亦有非常吸睛嘅粉紅鏡面蛋糕同精選玫瑰香檳，更特別用特製嘅四層金色鳥籠，裝上各式各樣嘅冷盤同甜品，打卡一流。而部分收益將會捐贈畀香港遺傳性乳癌家族資料庫，非常有意義。
文：Evita