深水埗又有新店！呢間走日系舒適風格，有榻榻米畀大家打卡兼Hea返陣。主打咖啡同手工甜品，招牌吐司要用蛋漿浸足一日再即點即煎，焦糖布丁嘅焦糖醬就每日用日本上白糖熬製，天使之鈴喺開舖前新鮮焗好，食得出花咗唔少心機！
 

十常八九位於深水埗黃竹街，裝飾以純白同淺木為主，唔少佈置都係同本地手作小店合作，好似木製榻榻米地台、季節鮮花擺設等。小店由幾位年輕人主理，集合咗佢哋各自鍾意食嘅甜品，所以選擇都相當多元化。
 

十常吐司（$72）

招牌吐司花足心思時間，鬆軟麵包用自家調配蛋漿浸至少24小時，期間仲要不時翻面，令蛋漿完全浸透麵包，再即點即煎。留意返因為要用慢火煎，所以落單後要等一段時間，不過吐司食落軟滑濕潤又帶蛋香，好似食緊玉子燒咁好特別，係值得等嘅！
 

吐司配搭牛油、楓糖漿同忌廉，盡量都採用日本材料，所以雞蛋、糖、麵粉都嚟自日本，忌廉更挑選北海道製，奶香濃郁又夠柔滑。香蕉上面嘅焦糖脆面亦係即點即燒，好脆口！
 

焦糖布丁（$38）

另一推介係近年日本喫茶店大熱嘅布甸，同樣亦係店主們自家研究嘅食譜，希望盡量突出蛋香。食落的確有濃濃雞蛋香，之後食到焦糖嘅甜味。
 

焦糖醬用日本上白糖熬製，甜得嚟仲有焦香嘅餘韻。布甸口感軟滑綿密，再加上北海道忌廉，細細份但好滿足。
 

天使之鈴（$38原味/$42抹茶）

即係法式甜品Canelé，睇落似迷你銅鈴因而有「天使之鈴」嘅名。店主指之前喺沖繩一間Cafe第一次食到Canelé，覺得好有驚喜所以就自己研究點樣整。每日開舖前新鮮焗製，做到外面脆裡面呈鋒巢狀嘅濕潤口感。
 

有原味同抹茶兩款，原味富蛋香。抹茶就用小山園抹茶粉，食得出抹茶清香，不過抹茶嘅回甘就被外層嘅焦香蓋過，重度抹茶控應該會覺得有啲可惜。
 

 

草莓忌廉奶油蛋糕（$62）

紅白賣相非常搶鏡，忌廉奶油即係Cream Cheese，再加入乳酪同北海道忌廉製作，所以白色嘅蛋糕食落甜中帶酸。士多啤梨會按時令挑選產地同品種，咬落酸甜多汁，整體相當清爽。
 

卷蛋（$48）

卷蛋同樣用北海道忌廉，以乾桂花點綴。食落以忌廉嘅牛奶香為主，而且鬆軟嘅蛋糕同Creamy嘅忌廉夾埋啱啱好。
 

Caffé Latte（$38熱/$42凍）

咖啡豆採用本地烘焙師出品，House Blend有兩款唔同風味，一款帶朱古力香而另一款偏果香，畀大家按自己喜好選擇。Latte唔單止有拉花，口感亦溫潤討喜。
 

黃豆黑糖豆乳（$48）

唔飲咖啡嘅話亦有梳打、花茶，同特飲，黃豆黑糖豆乳顧名思義就係黑糖豆漿配搭黃豆粉，上面仲有串煙韌白玉，黑糖香明顯而且甜度適中。
 

十常八九
地址：深水埗黃竹街2號地舖

文：Cathy
相、片：Tom Li