又有新開Cafe!今次呢間由人氣台灣過江龍桔梗班底主理,位於牛頭角佔地8,700呎,兩邊嘅落地玻璃窗加上以木為主嘅裝修感覺特別舒適。而且仲特別係餐廳裡面自設炒豆房及餅房,供應自家烘焙咖啡同新鮮焗製麵包,食物配搭亦有驚喜,值得一試!
樂感嘅英文名係Lagom Kaffe,而Lagom係瑞典語「Not too much, just enough」嘅意思,餐廳希望打造一個非一般嘅自由工作、咖啡、食物空間,因此不設限時,想飲杯咖啡Hea足大半日都得。
全日早餐($128)
一份有齊雞蛋、雜菌、沙律、煙肉、香腸同麵包,值得留意嘅係麵包係自家餅房出品,每日都會有唔同款式。採訪當日就係酸種麵包配無花果醬,外香脆內煙韌嘅麵包加上香甜唔膩嘅果醬真係無得輸。
豬肉·蘋果·楓糖三文治($88)
四款Open Sandwich嘅配搭都好有特色,好似呢款靈感嚟自桔梗最出名嘅三文治,以豬肉同煙肉配搭蘋果同楓糖,甜鹹交織。豬肉片嫩滑唔柴,同煙肉一樣偏鹹香,而多汁爽脆嘅蘋果同香甜嘅楓糖漿就可以中和油膩感。再加上半熟蛋同芝士,無論味道同口感都好豐富好滿足。
紅豆麻糬·抹茶·柚子窩夫($128)
窩夫裡面有抹茶麻糬,選用日本丸久小山園龍膽抹茶粉,抹茶香突出帶回甘。麻糬口感煙韌,所以窩夫食落外脆內軟糯。配自家製嘅柚子熱情果醬、柚子雪芭,柚子酸甜微澀嘅清香同抹茶香味好夾!另外仲有廚師自己煮嘅紅豆粒,唔會過甜蓋過其他味道,整體甜而不膩又清爽。
更多【新店直擊】: |
純粹拿鐵鮮奶咖啡($34)
咖啡豆都喺舖頭嘅炒豆房做烘焙,拿鐵選用偏Nutty嘅House Blend,飲落口感柔滑,風味以榛子同拖肥香為主,甜度適中相當順口。如果鍾意花果風味多啲嘅,仲可以加$5轉用佢哋嘅Fruity Blend。
手沖咖啡($78起)
手沖咖啡就有唔同單品豆選擇,拍攝呢款係巴西嘅日曬咖啡豆,有杏仁香氣,麥茶嘅烘焙香同茶感,酸味較為突出。
一入餐廳就會見到炒豆房
自家餅房每日新鮮出爐唔同種類麵包
樂感
地址:牛頭角觀塘道348號國際貿易中心1樓101號舖
文、相:Cathy