早前新加坡鹹蛋黃魚皮同薯片大熱，引來全城搶購，更不惜食炒價買水貨，認真誇張！最近有唔少本地品牌都推出包裝鹹蛋魚皮，包括華園、四海同祖味，價錢平一截而且便利店同零食店都買到，即刻試晒三款先比拼吓先！
香口鬆脆 四洲魚之皮脆蛋黃味
價錢：$35/60g （7-11）
味道：魚皮富鹹香，面頭舖滿鹹蛋黃碎，食得出鹹蛋黃味道同質感，厚度啱啱好，食落鬆脆。最似新加坡嗰種味，但唔係香港製造。
脆身微甜 華園鹹蛋黃炸魚皮
價錢： $55/100g （優品360）
味道：香港製造，魚皮大塊厚身但較硬，色澤偏橙，有鹹蛋黃味但唔算重，帶少少甜味，份量十足，感覺最抵食。
蒜味濃郁 祖味蒜香鹹蛋黃金脆魚皮
價錢：$30/50g （優品360）
味道：同樣香港製造，大塊又厚身，但質感微韌唔夠脆。蒜頭味重，一開封就聞到。食到鹹蛋黃，但唔太均勻，而且略嫌蒜味太濃喧賓奪主。
文、相、片：Perrins