旺角闹市飘茶香 新开楼上甜品茶室(有片)
2018-05-28

锺意饮茶嘅你有口福喇,旺角最近新开咗间以茶做主题嘅Cafe,店主去完台湾拜师学艺之後仲将当地嘅原茶叶带嚟香港。由近年大热嘅冷泡茶,到以茶入馔配合时令水果整嘅卷蛋、戚风蛋糕等都应有尽有喔。
 

 

位於旺角女人街楼上嘅小念头旺中带静,上到去装修好Homey,舒服得嚟最吸引嘅系有大玻璃窗,自然光透入嚟影相打卡都靓啲。而且有埋插座畀大家叉电,Hea足半日无难度。
 

季节茶香甜品


 焦烤菠萝乌龙戚风三文治($45)

因为舖仔细细,店主每日都会去采购时令新鲜水果,所以甜品Menu会不定期更换。开饭仔采访当日就有呢款用咗台湾凤梨搭配乌龙茶嘅戚风三文治。戚风蛋糕湿润而保持弹性,口感轻盈。而味道主要嚟自中间嘅台湾烘烤乌龙茶忌廉,茶甘味道非常突出。配埋烤过嘅焦糖凤梨,多汁清甜又有一丝丝口感,增加咗口感同甜味嘅层次。
 


爱文芒果红茶卷蛋($45) 

同样系时令嘅台湾爱文芒果,今次就配英国进口嘅Earl Grey。同戚风三文治一样,蛋糕湿润微甜,茶味主要嚟自中间嘅红茶忌廉,茶香芬芳醇厚。中间系一粒粒爱文芒果果肉,香甜之余又同红茶香好夹。而上面嘅芒果酱相比起嚟就味道较淡,胜在口感幼滑。
 


 铁观音芝士蛋糕($40)

双层芝士蛋糕加上通透嘅铁观音啫喱,卖相先加分。入口先食到芝士嘅酸味同奶香,但之後就会有铁观音嘅茶香慢慢由喉咙渗出嚟。原来呢件蛋糕上面系铁观音法式慕斯,茶味突出唔太甜,而下层系Cream Cheese蛋糕,茶香同芝士香各占一半,非常易入口。啫喱同朱古力酱都偏甜,可以按自己口味加埋一齐食。
 

更多【新店直击】:
1. 太安楼爆馅红豆饼 即制六款口味
2. 成都三甲火锅抵港 总店直送麻辣红油汤底
3. 沙田新开甜品店 日本直送酥皮苹果批

 
轻食+茶饮推介


法式蕃茄牛肉乳蛋批($68) 

几个女仔想嗌多个轻食一齐Share嘅话,呢个法式蛋批就啱啦。口味一样会按季节更改,开饭仔试到嘅呢个有新鲜制造嘅肉酱、车打芝士、鸡蛋、紫洋葱等配料,牛肉同洋葱都够哂惹味,车打芝士同酥皮亦焗得香而不腻。配搭嘅沙律加咗柠檬汁同橄榄油调味,味道清新。
 


冷泡金萱茶($40) 

店主曾经去台湾跟一位有30年经验嘅师傅学冲茶,唔单止将当地嘅饮茶文化带嚟香港,仲引入埋台湾嘅原茶叶嚟小店。好似呢杯冷泡茶就用咗金萱茶用室温浸泡约八个钟,之後再雪冻,唔需要加冰都够哂透心凉。入口清香,After taste嘅甘味突出,最後喺口腔留有少少甜味。呢个就系冷泡茶嘅其中一个优点,长时间浸泡令茶叶香味完全释放。而另一个优点就系少啲咖啡因,对咖啡因敏感嘅朋友仔都可以一试。
 


手煮铁观音黑糖奶茶($38) 

而热饮亦有相当花心思嘅手煮奶茶,即点即煮可以缩短茶叶浸泡热水嘅时间,一样可以减少苦味。而且步骤同细节都相当讲究,例如要先煮茶再加入牛奶,令铁观音茶香充分释出。奶茶会加入黑糖同少少炼奶调味,饮落茶香同奶香平衡,无港式奶茶咁苦,但一样有余韵。
 

 

暂时Menu都会有两款芝士蛋糕、布丁、雪糕蛋糕、戚风三文治、卷蛋同蛋批。最後温馨提示一句,小店逢星期一休息,唔好去摸门钉呀。
 








小念头
旺角通菜街75号1楼




文、相、片:Cathy

关键字
旺角
女人街
通菜街
Cafe
冷泡茶
铁观音芝士蛋糕
新店直击
走在最前线,为大家搜罗及报道有关新开餐厅的资讯。
餐厅资料
本月热门
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-10-07
牛大人火锅姊妹店!旺角新开台式烧肉吃到饱 任食澳洲 M5 和牛、SRF极黑牛霜降牛肉眼
2020-10-19
【即睇10月生日】酒店半价放题 Tiffany & Co.旗舰店导赏
2020-10-06
高级意大利菜餐厅尖沙咀重开 拥无敌海景 即席炮制经典芝士黑松露意粉+抵食3道菜午餐
2020-10-12
滋味到家!新鲜海野海鲜+逾200款蔬果肉类 食材直送上门网站推介2.0
2020-10-08