銅鑼灣嘅登龍街真係成條食街嚟，最新又開咗間樓上嘅日本食店，主打鯖魚同吞拿魚嘅，而且仲係由日本經營Toro鯖魚料理嘅專門餐廳SABAR，同香港經營吞拿魚、海鮮飯嘅專門店DORAYA合作一齊開嘅，質素有保證啊！

鯖魚同吞拿魚喺分類嚟講，同屬一類， 都係鯖科。兩種魚類當然都係每日由日本新鮮運到啦，其中鯖魚係嚟自福井 小浜巿同鳥取縣，堪稱日本最高級別嘅鯖魚嚟！送到嚟香港之後，會根據菜式選擇而決定以冷凍或者新鮮嘅方法處理。

去到餐廳，當然點都要食刺身啦。無論係鯖魚拼盤定吞拿魚拼盤，都係一盤四式。前者分別係以醋漬、豉油、煙燻、新鮮嘅方法製作，味道各有別但都一樣咁鮮甜爽口；後者就包晒有大拖羅、中拖羅、赤身同吞拿魚蓉，全部都好新鮮，油脂味香！

想一次食晒兩款刺身嘅，就要嗌刺身船拼盤啦~

至於熟食，首推招牌鹽燒肥鯖魚就將條近800克嘅鯖魚開邊燒，燒到魚皮香脆而保持肉質嘅鮮嫩。

燒藍鯺吞拿魚魚鮫就有兩個size揀，細啲嘅就斧頭size，巨型嘅就炸彈size。留意返炸彈要早兩日訂定呀！魚肉鮮甜，就連伴碟嘅醬都好好食！原來係用他他汁加薯仔加鯖魚製作㗎！

當然都唔少得丼飯同壽司啦~

仲有各式嘅日本啤酒同清酒選擇，其中嚟自福崗嘅Tsukushi燒酒嘅麥味突出，配鯖魚定吞拿魚都好夾。

SABAR x DORAYA
地址：銅鑼灣登龍街28號永光中心22樓

文、相：Kar