蟹迷最锺意一定系秋天，一系列嘅蟹都系最靓最当造时期！日本除咗北海道鳕场蟹、毛蟹之外，其实福井盛产嘅越前蟹都好出名架。丼丼屋今次再度引入「日本丼物选手权」嘅人气丼物，系来自福井县蟹料理专门店「滝の川」嘅福井蟹丼呀！
「日本丼物选手权」系富士电视台、文化放送及东京巨蛋主办嘅「东京故乡祭」活动其中一部分，集合全国最人气嘅丼物料理，入场人士可以逐一比拼试味，投选最美味嘅丼物。喺福井县开业40年嘅「滝の川」，凭招牌福井蟹丼参赛，去年首次亮相就勇夺第5名，一日卖超过3,800碗！今次系第一次冲出日本於海外发售，做法一模一样，原汁原味抵港。
有绝品！福井蟹丼($208，定食$228)同福井蟹丼($178，定食$198)两款，主角系福井红楚蟹，呢种蟹系深海品种，以11、12月最为当造，每只蟹大约重700至800克，拆好嘅蟹肉由当地直送至香港。蟹丼用上成碗蟹肉，而且有两只蟹份量嘅蟹味噌，蟹肉清爽结实，味道鲜甜唔会过咸，加埋蟹味噌已经好甘香鲜味，绝品版本仲有埋马粪海胆同三文鱼子，好豪华！
越前当地唔少餐厅都会推出蟹丼，「滝の川」社长荒矢纯一先生话，佢哋嘅蟹丼特别之处，系配上用两款酱油、日本最顶级昆布、木鱼汁、味醂等自家调制嘅酱汁，味道刚好唔会抢走蟹鲜味，而且白饭微暖同蟹肉最夹。食法系先将酱汁打圈淋喺蟹肉边，第一啖先食蟹肉加饭感受本身味道，之後先至再加蟹味噌一齐食，最後再加海胆同三文鱼子，鲜味好澎湃！明明好大碗，但唔经唔觉就清晒！
定食包埋沙律、蟹小钵同面豉汤，加咗醋嘅蟹肉酸甜开胃。
采访当日和泉素行SOKO都在场，仲大赞蟹丼好好味！不过想食都冇咁易，两款福井蟹丼每日只得20份，干日5:30pm供应，星期六、日及公众假期於11:30-2:30pm及5:30pm後供应。暂时只做3个月，只限以下4间指分店有售。
丼丼屋食堂
文、相、片：Perrins
