新店上场!葵广5间扫街推介
2017-10-16

葵涌广场一向多食店,最开心嘅就系附近啲学生、居民,经常平价食好东西,正!葵广呢排又新开几间小食店,有港式有中式有日式,劲多选择!开饭仔都忍不住冲咗去葵广试食,速睇葵广最新5间新店先!

超巨大8cm炸弹章鱼烧 金坂瀛

舖头原本主打铁板烧炒面、串烧,但佢哋最新引入超巨大炸弹章鱼烧,比起一般嘅章鱼小丸子大8倍,食一粒都饱晒,经过嘅途人都不禁哗然!

呢个拳头咁大粒嘅炸弹烧,入面有10款馅料:章鱼、虾、蚬肉、脆皮肠、原粒鹌鹑蛋、烟肉、鸡髀菇、粟米、椰菜及萝卜丝,劲丰富!

所有材料捞匀之後用日本酱油腌制,然後混以粉浆整成炸弹烧。

如果想更滋味,可加钱要埋自选配料,最受客人欢迎嘅有明太子沙律、芝士蟹子。

锺意食芝士嘅就一定要试呢个火炙芝士,喺炸弹烧上面放一块车打芝士,然後喺客人面前用火枪烧,令芝士融化,视觉效果一流。

另有铁板烧炒面,推介皇帝蟹极上豚肉卷配日式烧汁炒面,平价又饱肚,价钱为$35/份。

$25劲饱肚麻辣面 三和

葵广最新麻辣店应该系呢间开咗约一个月嘅三和。先从酸辣粉、幼面拣一款,再配麻辣手撕鸡、猪耳、鸡肾、猪脷、结头菜及黄豆,店员再加入秘制辣酱,捞匀就搞掂!

秘制辣酱系用四川辣椒、芝麻、花生等制成,麻辣味好重。配料分量都几多,而且都几入味,食完个嘴会有种麻痹感,辣味正宗。


4式咖喱set 友好嘢食

咖喱予人感觉好辣,但其实咖喱都有分不同辣度。呢间小店就可以畀食客们试到自己最啱食嘅辣度。一个咖喱拼盘,可食到咖喱、肉及小食。

咖喱有4款选择,按照辣度由小至大排列嘅有:港式咖喱、泰式红咖喱、泰式青咖喱、印度咖喱;肉类可选香草焗鸡髀肉、香煎牛柳肉粒、泰式猪颈肉及黑椒烟鸭胸,当中最受欢迎嘅系即叫即煎嘅牛柳粒!至於小食则有香葱薄饼、黄金芝士棒、香草饭团及蒜蓉包。学生更可以将小食转为迷你碟头饭/乌冬,够饱肚。

好有肉感嘅牛柳粒,配以重口味嘅咖喱,食落juicy又够辣。

怕辣嘅人都唔使惊,小食会跟送自家制苹果酱,能减轻咖喱嘅辣劲架!

门口好大块餐牌,够抢眼,简单易明。

神奇的雪糕热狗 KINPAN

虽然位处巷仔之中,但卖嘅小食、饮品都咁有gimmick,点会无客人呢?睇下餐牌,样样食物、饮品都有特别名称,例如流行经典50年、重口味、到紫一游、逃避时间、不要上班、不要长大,好搞鬼。

舖头皇牌item就系由北海道3.6牛乳雪糕配搭热狗而成嘅KINPAN,好特别!喺热狗外层搽上蜜糖再烘焗,再唧上冰冻雪糕,冷热交融,好滋味!

另有「小鲜肉」嘅芝士热狗,将热融芝士淋上热狗,classic又好味。

饮品方面,呢两杯绿茶沙冰、士多啤梨沙冰都好eye-catching,上面啲配料可由客人自己拣架,有朱古力、棉花糖、彩针等等!

我就最锺意呢杯紫薯沙冰「求学都是求分数」,饮落比起一般紫薯沙冰较为浓味,而且食到有紫薯蓉,好饮!

行住食嘅麻辣火锅 真好味麻辣烫

呢个主打麻辣嘅小店,特别设置咗一大个配料柜,放满三四十款配料!每串配料大约$6-$8蚊左右,买够6串仲送一串添!店员推介猪血糕、福洲鱼丸、手工香芋贡丸,款式特别啲,亦吸味啲!如果想饱肚啲,更可加钱配埋米粉、出前一丁等粉面。

首先客人拣选配料,然後店员将配料煮熟,再加入麻辣汤。麻辣汤由猪骨、四川辣椒熬成,设有3种辣度。开饭仔就拣咗牛柏叶、豆腐配小辣汤,配料好吸味,好辣,汤水亦非常辛辣,嗜辣之人应该会劲锺意。



文:Joy

关键字
葵广
葵涌广场
章鱼烧
咖喱
沙冰
紫薯
绿茶
麻辣
饮食潮流
开饭仔为大家发掘香港这个美食之都的最新美食资讯,分享饮食潮流文化。
餐厅资料
更多
收起
本月热门
【随时更新】零食速报 每周新款零食、酒品点评
4天前
【2021生日优惠】持续更新!7月寿星半价叹和牛烧肉套餐
2021-07-09
榴槤Buffet真的很兴奋~ 九龙区酒店7、8月限定榴槤盛宴
2021-06-30
尖沙咀新开烧肉Omakase 专人烧日本A5和牛+特级宝盒钻石肉
2021-06-28
投奔盛夏 7-8月份下午茶推介
2021-07-08