招牌珍珠奶茶+香港限定甜品!春水堂人文茶馆登陆观塘(有片)
2019-02-28

台湾珍珠奶茶始祖,香港首间概念店登陆观塘!招牌珍珠奶茶用黄金比例调配,每杯都要经过检定。而且唔单止可以坐低饮台式茶饮,仲有台式面食、便当、小食等,最受触目嘅就要数到香港限定嘅甜品系列!
 


春水堂人文茶馆系春水堂继西九站之後第二间香港分店,亦系首间人文茶馆概念店,同外卖店唔同嘅除咗提供堂食座位,亦多咗唔同台式料理,好似港人熟悉嘅牛肉面、鲁肉饭、卤味等等。新店约90%食材嚟自台中总部,有台中师傅留港一个月做监督,香港员工亦特别飞到台中受训一个月,要考试及格先可以成为正式员工,保证大家品尝到同台湾店一样嘅味道。
 

正宗台式茶饮


珍珠铁观音奶茶(堂食$34 外带$31)

叫得台湾珍珠奶茶始祖,嚟到当然唔少得要嗌返杯珍珠奶茶。比起用斯里兰卡锡兰红茶嘅珍珠奶茶(堂食$30 外带$27),呢杯改用铁观音做茶底嘅更受香港人欢迎!珍珠嘅大细同做法都跟足元祖做法,选用天然树薯粉同用朱古力粉上色,无添加焦糖色素或防腐剂,从台中低温送到香港後煮两个钟,至粒粒分明,外表光滑咬落烟韧Q弹。
 


而佢地珍珠奶茶另一特别之处系坚持黄金比例,每杯都要用仪器检测糖度同浓度,所以制作需时。原材料同冲调方法当然亦相当考究,精选台湾顶级蔗糖,用Shaker摇茶以摇出约1cm厚、雪白幼细嘅泡沫,更能够发挥奶茶清香。奶茶口感柔滑,铁观音幽香同蔗糖甜味平衡。
 


爱玉柠檬绿茶(堂食$34 外带$31)

台式饮品当然仲有唔少口味选择,爱玉冻同柠檬原汁同样嚟自台中,入口唔单止有柠檬嘅酸爽,仲带少少涩味,配茉莉绿茶令余韵更加清新醒神。爱玉冻口感滑溜,个人觉得如果爱玉冻分量再多啲会更有咬口。
 


白毫乌龙(只供堂食 $55)

如果你锺意饮茶嘅原味,就可以点佢地嘅文人茶系列,四款茶叶都嚟自台湾。白毫乌龙又名东方美人,以手工采摘一心二叶嫩芽,当中以夏天采摘嘅品质最好,茶汤橙红清澈,带独特嘅桂圆蜜香,回甘轻但悠长。
 


文人茶上枱後先品尝倒喺细杯当中嘅茶汤,之後就可以倒玻璃壶当中嘅茶,玻璃壶中嘅茶都饮完就先将茶壶当中嘅茶倒落玻璃壶,然後可以请店员回冲。先倒落玻璃壶嘅原因一嚟系稍微降低茶汤温度更易入口,二嚟可以更容易控制浓淡,三嚟无咁重容易啲倒吖嘛。白毫乌龙可以回冲2-3次,最啱同一样爱茶嘅朋友一齐慢慢享用。
 

更多【新店直击】:
1. 慢煮纽西兰牛肉、三文鱼 观塘工厦抵食日式丼饭店
2. 鲜鲍鱼珍宝喇沙、四色手工咖央多士 西环正宗娘惹菜荃湾重开
3. 全场划一收费 $20、$40、$60食海胆山+刺身+锅物 湾仔新开日式食堂

 
香港限定甜品


珍珠熔岩蛋糕($58)

知道香港人锺意食甜品,观塘店特别准备咗四款香港限定甜品,呢件熔岩蛋糕卖相最抢眼,松软嘅铁观音蛋糕配浓郁丰厚嘅忌廉、黑糖浆同珍珠,甜而不腻。
 


珍珠招牌红茶雪糕吐司($58)

法式吐司上面加上红茶雪糕、忌廉、黑糖浆同珍珠。雪糕红茶香味浓郁不过有少少碎冰,忌廉柔滑轻盈,而法式吐司带微微蛋香,脆边位点雪糕同忌廉一齐食最好味!加埋珍珠口感层次丰富。
 

台式料理介绍


功夫面($53)

台式美食有多款选择,功夫面其名由来好简单:因为要花好多功夫!肉燥选用猪後腿肉,加上香菇每日炒制,香气十足。面条粗幼适中,挂到酱汁之余口感柔韧。
 


金沙芋泥丸($48)

用手工芋泥包住咸蛋流沙馅再炸,芋泥微甜软绵、咸蛋咸香带沙沙口感,加埋原来又几夹,咸甜有致而且无油腻感。
 


招牌卤味豆干米血糕($48)

甚有台湾夜市感觉,卤味酱汁香辣惹味,米血糕软糯入味,而豆干就略嫌口感唔够Q。
 





春水堂人文茶馆
地址:观塘观塘道418号创纪之城五期apm一楼L1-1号舖




文、相:Cathy

关键字
观塘
珍珠奶茶
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2天前
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-10-07
牛大人火锅姊妹店!旺角新开台式烧肉吃到饱 任食澳洲 M5 和牛、SRF极黑牛霜降牛肉眼
3天前
高级意大利菜餐厅尖沙咀重开 拥无敌海景 即席炮制经典芝士黑松露意粉+抵食3道菜午餐
2020-10-12
【即睇10月生日】酒店半价放题 Tiffany & Co.旗舰店导赏
2020-10-06