纸语花香Origami Florist系一间专营鲜花婚礼布置嘅店舖,最近佢哋於湾仔开设品牌首间花艺咖啡店Natura:。咖啡店以四季花卉为室内设计概念,以品牌自家设计嘅保鲜花(又称永生花)及乾植物布置为主题,全属天然素材,完好咁保留返花朵自身美态及光泽。食物方面主打多国轻食,由拥有超过十五年入厨经验,曾於多间五星级酒店及米芝莲二星餐厅任职嘅主厨黄宇阳主理,主厨提倡「多菜少肉」,拒绝以牛入馔,而且坚持选用本地及日本嘅新鲜食材,希望客人食出食材原味,所有菜式健康之余味道都好有惊喜。
金沙芋泥窝夫($128)
首先店内嘅自家制窝夫一定唔可以错过,金沙芋泥窝夫用黑竹炭制成,两件口味唔同,一件加上咸蛋黄酱、猪肉松及爽脆椰菜丝,而另一件就系搭配香甜嘅紫芋泥、原片紫薯、水牛芝士及烟肉等,味道咸甜交错,锺意就咁食或者将肉松加上紫芋泥到食都得,味道一定令你有惊喜!
士多啤梨火龙果窝夫($138)
如果你系甜品控,呢个水果窝夫都啱晒你食~加入火龙果、士多啤梨及蓝莓等水果,仲有坚果醉增添口感,虽然有满满嘅北海道忌廉,但感觉一啲都唔甜腻呀。
全日早餐($158)
平时食All Day Breakfast嚟嚟去去都系嗰几款,呢度都几有特色,最特别系青苔大啡菇,铺上面豉香草面包糠,配搭黑松露炒日本广岛鸡蛋、迷你贝果、烟肉、车打芝士香肠、牛油果、圣女果、本地水耕菜等共八款食材。
更多【新店直击】: |
Energy Bowl($98)
有食想食得light啲,Energy Bowl一定满足到你,加入乳酪、有机燕麦片、椰子、士多啤梨、蓝莓、奇异果及芒果,仲好啱相机食先。
自选午餐($128起)
湾仔区返工嘅朋友就有福喇,午市佢哋仲有供应自选嘅和食套餐,食客可依照喜好自行混搭,包括一份汤、自选两款前菜、一款主菜及一份主食。推荐前菜日式苦瓜蛋饼,蛋饼特意将蛋黄及蛋白分开煎制,最後梅花间竹叠起,卖相好似意式千层面。
主菜方面,咖啡猪仔骨用自家浓缩咖啡粉腌制,咖啡味浓香;另外挪威三文鱼柳拌绿茶面豉酱亦好嫩滑。
餐厅入口位仲设有一个部份售卖自家设计保鲜花,对花艺有兴趣嘅朋友不妨嚟睇吓!
地址: 湾仔菲林明道8号大同大厦地下1-2号舖
文、相: Yanica