旺角有唔少樓上Cafe，但新開呢間一改固有印象，裝修以白色同淺木為主、採光度高，簡約風格加上植物裝飾，有種日系清新感。飲品同甜品選擇都相當多元化，例如手沖咖啡有嚟自日本唔同烘焙度嘅單品豆選擇，朱古力都有唔同產地濃度，甜品仲有超過10款任揀！
 

Bestow位於旺角登打士廣場，店名有給予、傳遞嘅意思。店鋪另一邊係選物店The Tabibito，店主指希望畀一個空間大家嚟買嘢、食嘢同飲嘢，同時Cafe用到嘅部分食器都係嚟自選物店，所以嚟到不妨留啲時間欣賞一下職人作品。
 

血橙椰子慕斯蛋糕（$60）

蛋糕部分以日式食材為主，亦有以當季食材入饌嘅選擇，例如呢個血橙椰子慕斯蛋糕就用咗坊間少見、又好啱夏天食嘅血橙，血橙多汁清甜、仲帶少少好似西柚咁嘅澀味。唔單止蛋糕上面有血橙果肉同自家製橙乾，白色嘅椰子慕斯裡面仲有血橙吉士同原味蛋糕。可惜血橙吉士嘅橙香偏淡，以至味道層次較少。
 

焦糖雞蛋布丁（$45）

雞蛋布甸每日新鮮蒸焗而成，質地相當Q彈而不失綿密。自家製作嘅焦糖漿屬於苦甜風味，後韻以焦香為主，同布甸嘅雞蛋香夾得嚟又甜而不膩。加上忌廉同車厘子點綴，以玻璃高腳杯奉上，好有日本喫茶店Feel嘅呢。
 

日本柚子果凍，青瓜蟹肉，酸種麵包配沙律菜（$88）

輕食就有貝果同酸種吐司選擇，呢款就用日本柚子汁製作果凍，再加柚子皮、柚子果肉，配搭大量蟹肉舖喺酸種麵包上面。柚子酸甜略苦嘅清香可以中和蟹肉嘅鹹味，再加上青瓜嘅爽脆，同本地製作、外脆內軟嘅酸種麵包，整體味道清爽。
 

Filter Coffee（$70起）

咖啡分為意式咖啡同手沖咖啡，意式咖啡選用大阪LiLo Coffee Roasters為Cafe調配嘅House Blend豆，有輕微果酸同朱古力風味，味道平衡。手沖會定期更換Roaster，現時有嚟自大阪嘅LiLo Coffee Roasters，同東京嘅Onibus Coffee。比起坊間一般以Nutty同Fruity區分，呢度會偏向以烘焙深淺度嚟劃分。
 

拍攝當日試嘅係LiLo嘅埃塞俄比亞淺焙豆，熱飲嘅時候會有檸檬嘅酸味，放涼至室溫後酸味減少變得似西柚，口感較薄。貼心點係咖啡師磨好咖啡粉後會保留一部分同咖啡一齊上枱，既可以畀客人聞香，如果想自己買咖啡豆嚟沖亦可以參考返磨粉嘅粗幼度！
 

Single Origin Chocolate（$53/凍，$48/熱）

唔單止手沖咖啡用單品咖啡豆，朱古力亦係用單一產地嘅朱古力，有帶花香、偏酸嘅厄瓜多爾66%，同果香、可可味為主嘅秘魯72%。建議如果第一次飲單品朱古力，或者怕酸嘅朋友可以同開飯仔一樣揀秘魯72%，可可香濃郁，口感厚到有少少漿口咁，朱古力控必點。
 

選物店The Tabibito，主打各款職人打造生活雜貨，包括咖啡店用嘅各款器皿

Bestow
地址：旺角登打士街43H號登打士廣場5樓

文、相：Cathy.H