如果你都锺意食港式小食同甜品，呢个品牌喺旺角新开嘅旗舰店就啱晒啦！主打重新演绎嘅街头小食同地道甜点，当中DIY系列更系边玩边食，好似即叫即撞嘅堂弄豆腐花，同用调色盘奉上各款酱料嘅鸡蛋仔。餐厅楼高两层，装修更糅合怀旧公园游乐元素，更有玩味。
旗舰店装修糅合公园游乐元素
小点角落坐落於旺角白布街，店内设计意念嚟自香港以前公园里面嘅游乐设施，例如管道滑梯造型嘅灯饰，模仿马骝架嘅方格墙身，扮近氹氹转嘅圆枱等，有无勾起你嘅童年回忆呢？
DIY系列有得食又有得玩
堂弄豆腐花（$108）
餐厅招牌甜品之一就系堂弄豆腐花，店员会即席将豆浆撞入石膏粉同生粉水中，用沙漏计时等10分钟，就有一盘新鲜制作、软滑而有豆香嘅豆腐花啦！叫得新派甜品店，配料当然亦非一般啦。
堂弄豆腐花嘅配料同糖水可以自由配搭
木盘上会有三款配料：香甜嘅蜜红豆薏仁、薄脆嘅炸豆腐皮、用Super Food自家制作嘅手工小圆子；同三款糖水：清甜嘅桂花冰糖、姜味突出嘅黑糖姜燕麦、茶香清幽嘅香片桂圆。当中最特别嘅系手工小圆子，每日轮流有两款口味，拍摄呢日就系红色嘅杂莓红火龙果，同黄色嘅芒果姜黄。
鸡蛋仔101画室（$88）
鸡蛋仔101画室就充满艺术感，中间系外脆内Q嘅三重芝士鸡蛋仔，旁边嘅系酱汁，有餐厅自家研发嘅麻辣朱古力酱，同花生酱、杂莓果酱、柠檬酱，而炼奶同海盐焦糖就以颜料管盛载。放心餐厅有特别标示所有食材用具都系食品级，可以放心创作属於你嘅鸡蛋仔大作！
经典甜品新食法
豆腐冻芝麻糊（$58）
将常见嘅芝麻糊豆腐花分拆再组合，食嘅时候先敲开竹炭糖片，再将芝麻糊倒到豆腐冻上面。芝麻糊相当细滑厚身，食得出天然黑芝麻香气，豆腐冻甜度较低，再加上竹炭糖片脆身口感，口感丰富又唔会太甜腻。
麻辣朱古力梳乎饼（$118）
（左）梳乎饼，（右）麻辣朱古力酱
梳乎厘就听得多，呢度嘅梳乎饼其实系将梳乎厘制作成铁锅班戟造型，口感轻盈入口即溶，就咁食带蛋香同淡淡甜味。加埋餐厅自家研发嘅麻辣朱古力酱、海盐芝士奶盖，同奇脆朱古力意式雪糕，可以配搭出唔同味道同口感。
更多【新店直击】： |
麻辣S’MORE（$52）
麻辣朱古力酱亦可以变成饮品！呢杯麻辣S’MORE同样以餐厅用61%法国朱古力及四川花椒等调配而成嘅麻辣朱古力为基底，加入橙皮、龙舌兰蜜，最後加上灸烧自家制棉花糖。未饮先闻到辛香料味，入口会先有少少麻感，之後就系朱古力嘅甜味，最後先有少少辣味渗出，层次丰富。
Fusion版港式街头小食
玛莎拉咖哩鱼蛋配手抓饼（$58）
街头常见嘅鱼蛋都可以嚟个Fusion升呢版，餐厅选用多种香料包括小茴粉、小荳蔻、丁香、玉桂、辣椒粉、咖喱粉等制作印度风味嘅玛莎拉咖喱，香气更为浓郁，味道层次亦比一般咖喱丰富。鱼蛋口感弹牙，完全无粉感。而且特别配搭酥脆嘅手抓饼，点埋咖喱汁食真系无得输。
花胶碗仔翅蒟蒻面伴炸紫菜 （$68）
碗仔翅以木耳丝、冬菇、鸡丝和鸡汤为汤底，特别加入新西兰鳕鱼胶同以蒟蒻面取代素翅，足料好味又健康啲！中途可以加入醋换个口味。亮点在於碗边嘅自家鲜炸紫菜天妇罗，口感香脆同碗仔翅又好夹。
小点角落
地址：旺角白布街2-24号艺兴大厦地下4号舖
文：Cathy.H
相、片：Yan Yan
