母親節除咗送鮮花，亦可以送花造型或者口味嘅蛋糕！今年唔少母親節蛋糕回歸經典以花為主題，優雅又搶眼，各位孝順仔女記得幫媽媽同蛋糕影多幾張靚靚打卡相呀。
目錄
玫瑰西柚撻、玫瑰荔枝蛋捲 Kiyoka
由嚟自京都嘅主廚松原明日香主理嘅法日甜品品牌，今年推出兩款以「獻給媽媽的玫瑰人生」為主題嘅甜點。玫瑰西柚撻頂層係粉紅色嘅玫瑰忌廉，包住西柚玫瑰醬同牛油撻皮，甜味清新。而玫瑰荔枝蛋捲內餡加入糖漬荔枝肉，加上新鮮覆盤子、朱古力同金箔點綴，層次豐富。
As Sweet As Mama、Love You Bunches Vive Cake Boutique
人氣手工蛋糕店推出花藝蛋糕系列，兩款蛋糕都加入由人手每天新鮮挑選嘅鮮花，靚到好似藝術品咁呀。As Sweet As Mama以朱古力勾劃女神姿態，Love You Bunches賣相就好似花盒咁，更有春日氣息。兩款蛋糕都可以分別選擇唔同嘅蛋糕口味，更適合口味喜好分明嘅媽媽們。
La Belle Fleur、L'amour agnès b. Café
如果係買畀著重健康嘅媽媽，可以考慮呢個選用稀有糖製作嘅蛋糕系列。La Belle Fleur係紫色花型設計，以黑芝麻焦糖蛋奶凍配搭焙茶巴伐利亞奶凍同雪芳蛋糕，口感軟滑。另一款L'amour係橙粉紅心形造型，覆盆子雪芳蛋糕加上番石榴慕絲、覆盆子及無花果醬，味道酸甜。
更多【開飯專題】： |
Blooming Love La Famille
紫色嘅Blooming Love其實係柚子花香戚風蛋糕，上面以手工製朱古力山茶花點綴，裡面就係柚子桂花戚風蛋糕，加上希臘乳酪鮮忌廉同慕絲。戚風蛋糕口感輕盈，加上柚子嘅清新香氣，同希臘乳酪鮮忌廉嘅微酸，食落意外清爽唔膩，當飯後甜品都唔怕Heavy呀。
瑰麗寶盒雪糕蛋糕、花式時尚雪糕蛋糕 Häagen-Dazs
今年呢間連鎖雪糕品牌就以「For My Most Precious Mum」為主題，設計集合媽媽們鍾意嘅元素嘅蛋糕。瑰麗寶盒雪糕蛋糕頂部有玫瑰花同禮盒裝飾，裡面就係士多啤梨雪糕。花式時尚雪糕蛋糕有齊士多啤梨、比利時朱古力、夏威夷果仁同雲呢拿四款皇牌口味雪糕，一家人分享最啱。
開心果櫻花覆盆子蛋糕、士多啤梨白桃忌廉蛋糕 Italian Tomato
嚟自日本嘅連鎖蛋糕店品牌今年嘅母親節蛋糕亦糅合鮮花元素，好似開心果櫻花覆盆子蛋糕裡面有覆盆子櫻花麻糬忌廉，配搭開心果忌廉、覆盆子果餡同海綿蛋糕，甜而不膩。而士多啤梨白桃忌廉蛋糕以可食用紅玫瑰裝飾，下面係有士多啤梨餡同清香白桃片為夾心嘅白桃海綿蛋糕。
文：Cathy.H
