眾所周知，日本好興立食文化，由立食壽司、立食燒肉甚至立食居酒屋都有，而呢種立食文化近年都慢慢傳到嚟香港。最新嘅有開喺將軍澳嘅一間立食醬油拉麵店。
呢間立食醬油拉麵店行時尚工業風格，並由連續5年喺大阪排名第一嘅拉麵達人松村貴大主理湯底，用上唔同嘅醬油混合、提煉，再加入多款貝殼類海產熬製，再由日本空運直送到港。大家試碗麵嘅時候，不妨都可以先嗶一匙湯底飲啖，唔會太鹹之餘，仲幾鮮甜。
餐廳主要提供4款口味嘅拉麵同埋幾款小食。當中最推介嘅一定係和歌山橫縞鰹魚醬油拉麵，湯底嘅醬油香中滲有香濃嘅魚味，連帶麵條都有陣陣魚鮮香味。日本直送嘅慢煮三和豚肉叉燒有陣陣煙燻過嘅香味，口感軟腍。
另一款同樣有魚香嘅拉麵係瀨戶內海小魚干醬油拉麵，但佢同鰹魚嗰隻湯底嘅香味又有啲唔同，呢隻係偏重少少鹹香，但同時又有種清甜。
至於鍾情重口味少少嘅朋友，青森黑白蒜味醬油拉麵應該最啱，幾款口味中味道最濃，無論係蒜香定醬油味都頗為突出。
小食方面包括有鰹魚汁浸菠菜、松村秘製餃子、日本海哲、胡麻章魚、帆立貝裙邊同埋味付粒貝。另外而家仲有新張優惠，喺指定位置打卡兼upload嘅話，就可以獲贈日式小食券一張。另外，喺舖頭消費就可獲免費北海道Icenoie Gelato義式雪糕券一張。
Ramen Yaichi
地址: 將軍澳唐德街1號將軍澳廣場1樓Kiosk A
文、相、片：Kar