成日都話將軍澳係美食沙漠？隨住而家愈來愈多新樓盤落成，將軍澳都陸續有唔少餐廳進駐喇！今次呢間全新嘅日式鐵板燒，主打高質素嘅鐵板燒料理，由擁有豐富國際廚藝經驗嘅日籍主廚三原光史先生主理，主要供應晚市廚師發辦及一系列午市及晚市單點菜單。三原先生會挑選當日最時令嘅食材及海產，搭配自家製醬汁、高湯及調味料，令食客有滿足嘅鐵板燒體驗。
三原先生曾於日本駐美國芝加哥領事館擔任總領事之首席家廚，就任三年期間親自為總領事及來自世界各地嘅達官貴人炮製最地道嘅日本料理。
鹽釜燒「青森縣鮑魚」（時價；須提前一天預訂）
最不可錯過嘅，當然有呢味以三原先生拿手絕活之一「鹽釜燒」嚟炮製嘅日本青森縣鮑魚！方式有如「焢窯」一般將海鮮燜熟，選用大蜆牛油汁，加入北海道海膽及昆布，以大量粗鹽包裹鮑魚將其燜熟，以鎖住鮮味。最後淋上香草牛油及海膽汁，鮑魚新鮮彈牙。
黑毛和牛西冷薄燒
選用宮崎牛，入口即溶，肉汁豐富，捲埋蔬菜食就無咁膩。配上壽喜燒醬汁食更香甜惹味。
香煎鰻魚伴軟滑鵝肝
鰻魚用鰻魚汁燴成，肉質軟腍味道濃郁鮮香～法國鵝肝加入黑醋汁中和油膩感，主廚更會以日本米茄墊底，等米茄吸收晒鰻魚及鵝肝嘅油香及醬汁精華！
北海道銀鱈魚朴葉燒
選用加拿大銀鱈魚，烹煮時同京都朴葉同燒，令魚肉帶陣陣朴葉清香。搭配埋日本舞茸菇及靈芝菇，口感層次更豐富。
更多【新店直擊】： |
宮崎和牛西冷
宮崎和牛油脂豐富而且清爽唔膩，肉質有咬口。大廚只簡單以鹽及黑椒調味，咁就可以食返牛肉最原始香味，四面煎香後rest四分鐘鎖住肉汁。附有三款調味料，包括青森蒜片、日式芥末及醬油，最建議點芥末食，可減低油膩感。
宮崎和牛蒜蓉炒飯
相對於一般鐵板炒飯，三原先生嘅炒飯比一般炒飯濕潤，類似於釜飯～和牛蒜蓉炒飯吸收晒和牛脂香，加埋蒜蓉更惹味！
士多啤梨抹茶紅豆蓉班戟
最後當然要以甜品作結喇～三原先生特別於班戟粉中加入蛋白及Ricotta Cheese，班戟香甜鬆軟；加入紅豆蓉及新鮮士多啤梨，最後灑上開心果碎及抹茶粉，味道啱啱好唔會太甜。
地址: 將軍澳唐俊街18號The Parkside第一座地下G06號舖
文: Yanica
相、片: Tom Li