寵愛媽媽 母親節自助餐精選 多款窩心驚喜菜式/禮物
2023-04-27

踏入5月,就係媽媽專屬嘅月份啦。除咗送花送禮物,梗係仲要帶媽媽去食好嘢孝敬下佢啦!母親節自助餐有好多,今次特別精選咗6間,係有專為媽媽而設嘅菜式或小禮物,相當窩心。


目錄

  ►  限定「鮮」氣十足自助餐:The Place
  ► 法式海鮮饗宴自助晚餐:咖啡廳
  ► 中式小菜自助晚餐:Sky Lounge
  ►  母親節海鮮自助晚餐:8度海逸酒店
  ►  燕窩主題甜品+心思小手作「迷你永生花」:尚廚
  ►  甜蜜時刻母親節自助晚餐:花月庭


限定「鮮」氣十足自助餐 The Place  

如果各位母親們鍾意食海鮮,咁呢個「鮮」氣十足嘅自助餐就啱晒啦!包括即開新鮮生蠔、冰鎮龍蝦、鱈場蟹蟹腳、麵包蟹同阿根廷紅蝦刺身,款款都新鮮又鮮甜,特別係紅蝦刺身唔係周圍有得食。另外有由米芝蓮星級粵菜明閣主理的招牌叉燒及即切片皮鴨等。仲有為每位媽媽準備嘅日式刺身心型拼盤,媽媽見到實心心眼~ 

供應時間:2023年5月13至14日


法式海鮮饗宴自助晚餐 咖啡廳 

另一間以海鮮作主打嘅buffet,但呢間就以法式海鮮為主,又係另一種享受呀。供應經典料理如如法式香草焗田螺、法式海鮮飯及烤鱸魚配檸檬牛油汁,香濃又惹味,當然唔少得冰鎮海鮮、即開生蠔同多款即煮熱葷。於母親節當晚,即燒烤肉將升級至燒澳洲和牛戰斧扒及蜜汁烤火腿,前者肉味香濃又軟諗,後者鹹香得嚟帶蜜汁嘅香甜。每位媽媽們更可獲贈蠔皇六頭吉品鮑魚配花膠乙客,食完滋補又養顏。 

供應時間:2023年5月14日


中式小菜自助晚餐 Sky Lounge

老一輩通常都比較鍾意食中菜,呢間酒店餐廳就有供應中式小菜自助晚餐!首先有火候十足嘅老火湯,菜式方面有招牌蜜汁叉燒皇,肉質軟腍又帶燶邊,仲有脆果青瓜炒蝦仁及清蒸大海斑等。每位惠顧中式自助晚餐嘅顧客,都可獲贈蟲草花螺頭燉雞湯一客,媽媽飲完個心都甜晒。

供應時間:2023年5月13至14日


海鮮自助晚餐 + 甜品烘焙班 8度海逸酒店  

呢間酒店嘅母親節海鮮自助晚餐一樣好多海鮮,每日兩款空運到港嘅法國、美國或愛爾蘭即開新鮮生蠔;冷盤青檸青酒浸大蜆、麻辣魷魚洋蔥沙律;現場即製嘅醬燒鮑魚同天婦羅帶子。甜品誠意推介綠茶朱古力心太軟及酒店招牌甜品芒果拿破崙,另外每位媽媽可免費享精緻杯子蛋糕乙份!大家上一次同媽媽一齊煮嘢食又係幾時呢?只要食自助餐就可享優惠價HK$400參加甜品烘焙班,咁就可以同媽媽一齊整蛋糕,好溫馨~

供應時間:2023年5月13至14日


燕窩主題甜品+心思小手作「迷你永生花」 尚廚 

必定獲得母親大人歡心嘅自助餐呀,因為呢間自助餐特別加添燕窩主題甜品,包括燕窩士多啤梨撻、北海道3.6牛乳燉燕窩蛋白、燕窩葡國蛋撻等,款款甜蜜養顏。當然鹹食都一樣咁吸引,自助晚餐供應松葉蟹腳、煎鴨肝、一口和牛、香草烤黑毛豬腩卷、鵝肝醬慕絲開心果及牛油果醬香辣蠔脆餅等~另外酒店特別委托將軍澳嘅翠林綜合職業復康服務嘅「思藝手作」,由殘疾人士製作「迷你永生花」一束送畀每位母親,為母親節增添暖心意義。

供應時間:2023年5月13至14日


甜蜜時刻母親節自助晚餐 花月庭 

媽媽食完一定覺得甜蜜蜜嘅自助餐。冰鎮海鮮包括啖啖肉的長腳蟹、藍青口、熟海蝦、翡翠螺及新西蘭青口等凍海鮮,鮮甜十足。呢個照燒鮑魚甜薯香酥盒都好推介,照燒鮑魚燜得軟腍入味,甜薯蓉質地細滑,香酥盒入口酥脆,一啖食晒好滿足。另外甜品都令人驚喜,燕窩苿莉花茶香梨千層班戟蛋糕由一層薄薄嘅班戟皮同苿莉花茶慕絲及香梨粒疊砌而成,面層再加上燕窩,味道香甜。每位媽媽除了可獲贈花菇蠔皇炆花膠乙客,更可獲贈CANVAS天然清爽透薄防曬乳液SPF30 10毫升及HK$100現金購物禮券乙份,有得食仲有禮物收!

供應時間:2023年5月13至14日



文: Yanica

关键字
母親節
自助餐
海鮮
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
持續更新! 2024生日優惠 食盡歐亞各式料理
2024-07-02
【2024新店精選】6月更新! 嘆和風鰻魚飯、雞白湯拉麵
2024-06-18
【隨時更新】零食速報 每周新款零食、酒品點評
6天前
前五星級酒店烘焙主廚尖沙咀開店 推千層酸種蛋撻、牛角包
2024-06-26
壽喜燒推介2024!薈萃日本三大和牛關西壽喜燒、無限量食仙台A5霜降黑毛和牛
2024-06-18