大埔新开西日纯素Cafe 叹妈妈定食+手作饺子+甜品
2020-07-20

平时食开素同唔系食素嘅朋友想一齐食饭都要左拣右拣?大埔呢间新开嘅Cafe就供应多款日式同西式纯素菜式,希望等大众知道原来素食都可以好多元化亦好好食!好似日式妈妈定食,新猪肉肉饼加埋素芝士够惹味;甜品柠檬挞同样系纯素,挞底嘅松脆度拍得住一般版呀。
 


V.W Vegan Cafe由两姐妹同姐姐嘅先生三个人主理,供应嘅全部都系纯素食品,食物会用素芝士,饮品就以豆奶或者燕麦奶嚟代替牛奶,糖亦会采用GI较低嘅龙舌兰蜜或者较天然嘅枫糖浆,煮食时亦尽量少盐、少油同唔添加味精。
 


日式妈妈($88)

个名非常有趣嘅定食,六个项目除咗饭同汤,其他都会不定期更换。新开张呢期就有日本渍物、新猪肉芝士肉饼、凉拌秋葵豆卜枝竹,同甜品蜜桃寒天。食材都尽量选用有机或者本地出品嘅,好似驰名树记鲜枝竹、豆卜,有机豆腐,有机面豉。饭亦系用珍珠米,粒粒饱满烟韧。
 


日本渍物口感爽脆,酸味醒胃。新猪肉芝士肉饼嘅新猪肉用日本酱油腌过,无论系味道同口感都真系几似猪肉,中间仲有纯素芝士,有牵丝效果!凉拌秋葵豆卜枝竹嘅鲜枝竹非常富黄豆香。蜜桃寒天软滑Q弹,可惜略为过甜。
 


魔魔饺子($58/6件,下午茶套餐$68/4件配$45或以下饮品一杯)

自家制作嘅手工饺子,有新猪肉芝士、新猪肉椰菜同新猪肉韭菜三款口味,前两者可走五辛。煎成冰花饺子,够香脆之余,值得一讃嘅系水饺皮薄同时又烟韧。
 


馅料亦够多,开饭仔拣嘅新猪肉韭菜饺子有好香嘅韭菜味。另一亮点系秘制辣酱!用逐粒拣过嘅辣椒加香茅等香料调配而成,辣得嚟又够香,如果系食得辣嘅朋友应该会食上瘾。
 


天然酸种包(下午茶套餐$68配$45或以下饮品一杯)

Sourdough系嚟自大尾笃一间手工制作纯素天然酸种面包嘅面包店,边位香脆而里面烟韧而有少少酸味。配牛油果酱、自家制果酱、纯素忌廉芝士等其中一款酱料。开饭仔就拣咗牛油果酱,软滑得嚟仲保留少少果肉本身嘅咬口,口感丰富。
 

更多【新店直击】:
1. 人气韩国菜馆将军澳开分店 猪髀仔芝士拉丝比赛 拉至指定高度可获半价
2. 长沙湾新黑白主题Cafe 全黑糯米窝夫、咖啡鸡蛋布甸有惊喜
3. 湾仔新开和牛寿喜烧专门店 关西风味 超滑和牛油花爆香

 

柠檬挞($48,下午茶套餐$68配$45或以下饮品一杯)

最受欢迎嘅食物,开饭仔采访当日下昼四点未到就卖晒喇。由本地一位纯素妈妈制作,难得嘅系无落到鸡蛋,但挞底食落口感相当松脆!柠檬馅味道清新,酸味突出而唔会呛喉,加上点缀嘅薄荷叶更Refreshing。唯一缺点系挞底略厚,令整体口感有啲乾。
 


Latte($45/热,$48/冻)

特别搵嚟本地烘焙咖啡品牌Bulu Coffee,帮餐厅配搭一款夹到植物奶嘅House Blend咖啡,而且用嘅咖啡豆都系公平贸易或者直接贸易。Latte带明亮嘅果酸,口感顺滑。
 


Super Green($58)

用羽衣甘蓝、香蕉、奇异果、香茅等打成沙冰状,饮落酸酸甜甜咁,盖过羽衣甘蓝嘅草青味,清新得嚟非常易入口。
 


装修走田园风格,有唔少手工乾花装饰,一角亦有售卖天然手工制品。皆因店主唔单止希望更多人尝试纯素,亦有关注动物权益同环保议题,餐厅用嘅外卖用品都系可生物分解,饮筒更加系可食用嘅大米吸管。餐厅亦同本地农夫合作以物易物,好似最近就用餐厅嘅咖啡渣换取农园嘅指天椒。
 




V.W Vegan Cafe
地址:大埔宝湖道3号宝湖花园商场2楼227F-06号舖




文、相:Cathy

关键字
大埔
纯素
vegan
日式妈妈
魔魔饺子
咖啡
V.W Vegan Cafe
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
2020-09-11
全城抗炎!屋企都叹到三层架下午茶 Tea Set外送/外卖自取推介
2天前
悠闲时光 9月份下午茶推介
2020-09-02
【2020中秋】台式流心奶皇、电车限量版月饼 早鸟优惠及限量预购精选集合 (不断更新)
2020-08-20
【9月生日优惠】最低至半价!生日平食放题.韩式炸鸡
2020-09-02