話咁快喜茶香港二間分店就登陸銅鑼灣時代廣場啦！飲品方面雖然就無新驚喜，但今次最唔同嘅係銅鑼灣店係智慧型店HEYTEA GO，客人可以透過官方APP進行手機落單，咁就唔駛排三個鐘先飲到啦！
但電話落單就暫時未用到住，但我地首先睇下係點用先啦～到時下載咗官方APP後，揀完想去分店，餐牌就一目了然，而且分類都幾清晰，揀完比咗錢跟返約定時間去拎野飲就得，仲可以實時查看進度同埋有野飲拎會自動通知。。
銅鑼灣店個MENU就同沙田店大致相同，不過就無沙田店先有嘅雪糕雞蛋仔。雖然今次就無新飲品同甜品，但開飯仔都介紹幾款之前無介紹過嘅比大家啦～首先就有波波系列，雙拼波波($30/38)，內有黑糖形珠同黑糖奶凍，一次過有珍珠煙韌同奶凍爽滑嘅口感。黑糖係每日現場手炒，小火燜煮數小時製作而成。另外仲有Oreo波波($28/36)同布蕾波波揀($28/36)。
雪糕方面就有茶王雪糕($12)同芒芒雪糕($28)，茶王雪糕茶味尚算香濃～
咁當然唔少得一向都好受歡迎嘅莓莓芒芒同滿杯系列！銅鑼灣開店日(12/1)仲會有買一送一優惠，準備好排隊未？
地址: 銅鑼灣勿地臣街1號時代廣場B2層B216號鋪
文: Yanica
相、片: Kar