出街食饭,最好梗系可以坐耐啲,舒舒服服慢慢食啦,不过有时都有例外嘅。例如赶住睇戏呀,或者得一支公去食,再唔系就系粮尾要悭住使呀咁,就会想搵返啲平平地、又快快脆但都「食得落肚」嘅嘢食,唔想次次都系咬包或者快餐店,其实有冇谂过food court都系一个唔错嘅选择?仲可以唔使就朋友想食乜,我食日式你食中式都可以坐埋一枱食。皇帝鸡 Photos by msamypoon & Foodie.jody由韩国人开嘅韩式炸鸡舖,food court价钱但系餐厅嘅享受,一兜炸鸡最平30零蚊就有交易,再搭埋炸年糕添,系几抵食。炸鸡有3种味拣:韩辣、酱油同甜辣,全部都热辣辣,又够多酱,都几惹味,惟一要挑剔嘅系炸鸡块皮唔够脆罗。Istanbul Kebab Photos by Szekaijessica & 阿丸土耳其嘅嘢食喺香港都唔算话好普及,不过有去过土耳其旅行嘅朋友,或者间唔时都会挂住嗰边嘅kebab。Kebab即系用软身嘅薄饼包住一堆菜、肉同酱,算系平得嚟又填得饱肚嘅小食。呢间餐店嘅kebab主要有羊、鸡、牛肉拣,都几足料,羊肉kebab有微羶味。用锡纸包住食,里面比较多汁,怕食得麻烦嘅可以拣叫饭。BTW餐牌上有道「原味乳酪」,奉劝真系要好有勇气嘅朋友先好试。French Corner Photos by hk.foodie & apple妹 又系开喺西九龙中心,冇计,佢个美食广场真系比其他商场嘅出色。就好似呢间舖头仔咁,廿蚊就可以买到9粒章鱼小丸子,粒粒都涨卜卜,淋晒烧汁洒上紫菜,即叫即整够晒热。粉浆嘅比例啱啱好,如果真系要挑剔嘅系里面粒章鱼比较细罗。舖头另外有卖窝夫,9蚊件,好抵。窝夫底系格仔饼嚟,整得都几松软脆口,可以拣返朱古力酱或者花生酱。素食轩 Photos by mx8034 & 乔子喺红磡嘅foodcourt入面,睇演唱会前食啱晒。印象中好少可啲foodcourt会有斋舖,呢间舖仲要有苦瓜呢味餸畀人拣……讲真,味就唔算真系好好味,但你嚟呢到食,都系求快同抵啫,佢符合晒。三餸饭40蚊有找,仲有多碗汤。食苦瓜嘅就梗系拣苦瓜炒蛋,其他餸例如茄子、素肉饺等等都OK㗎。za爷煮意 Photos by Browncony 鰂鱼涌个美食广场入面,咩国菜都有得食,其中呢间食西餐嘅,都有烧春鸡食!有得拣半只或者全只,只鸡整得几入味,难得鸡肉都系滑嘅。另外有经典嘅农夫包,香脆包入面装住嘅系咖喱黑豚肉,仲要跟多碗饭,一定够饱。而呢度嘅王子蒲烧鳗鱼脆黑汉堡或者都吸引到好多人,竹炭汉堡夹住超长鳗鱼同厚玉子,又系相机食先啲friend。 文:Kar随时接收最新资讯赞好OpenRice专页!