慈雲山呢個主打新概念嘅超市，最近美食區內新開咗呢間熱狗專門店，一共十款口味。全部熱狗即叫即製，香腸選用碎豬脾肉，而且係用價值二百萬、由德國引入嘅機器每日現場蒸及煙燻，好新鮮，喺香港真係好少見！
所有香腸每天新鮮即製。
原條鰻魚滑蛋熱狗($42)
人氣No.1嘅原條鰻魚滑蛋熱狗，加入原條蒲燒鰻魚、炒滑蛋、木魚絲及紫菜絲，最後淋上香甜嘅鰻魚醬汁，啖啖鰻魚肉加上滑蛋，好味又抵食。
熱溶芝士火辣熱狗($36)
選用現場自家製辣肉腸，加入芝士、生洋蔥、黃芥末及辣肉醬，經焗製後「芝」味更香濃，香辣惹味。
原隻軟殼蟹滑蛋熱狗($42)
同原條鰻魚一樣，呢度放入原隻軟殼蟹，夠晒足料。加埋炒滑蛋、木魚絲及紫菜絲，口感同味道同樣咁豐富。
惹味洋蔥圈熱狗($36)
洋蔥圈熱狗真係第一次見！將自家製法蘭克福香腸放入洋蔥圈內，再加埋芝士粉及BBQ醬，又幾有新鮮感。
原味地道熱狗($28)
食熱狗又點少得Original口味，法蘭克福香腸配上芝士粉、茄汁、BBQ醬、黃芥末及酸瓜醬，食出最原始嘅風味。另外而家仲有個好抵嘅優惠，只要加$12就可以任選兩款小食/飲品，學生們加$5就得喇！
地址: 慈雲山毓華街23號慈雲山中心2樓213-222號舖
文、相、片: Yanica