AP鴨粉絲應該等咗呢日好耐喇，香港終於有間AP鴨嘅主題café，雖然只係期間限定，但都好過冇吖~ 你哋去咗朝聖拜見AP鴨未先？店內除咗有多款造型食物，亦有唔少精品發售呀。如果你哋之前未去到或斷晒貨未買到嘅，唔緊要！過兩日（12月14號）又有新貨返啦~

話說AP鴨好叻叻鴨咁贏咗Sanrio人物大賞香港區冠軍，所以就有今次呢間café出現，畀各位粉絲一齊去慶祝同聚會啦。未行到入舖，離遠已經可以見到大大隻AP鴨喺門口迎接大家啦，用餐區嘅牆身更加全部都係AP鴨，成間舖都係打卡位！

Ahiru No Pekkle漢堡配 薯條，個包面就有隻AP鴨喇。呢個漢堡唔淨止有塊扒，仲有雜菜同薯餅添，飽肚啊。

北海道豚肉腸咖喱蛋飯則用白飯砌咗AP鴨個樣出嚟，so cute啊~ 但要食呢碟飯，就要狠心啲撈勻啲咖喱汁，令到AP鴨變咗做花面鴨喇科科~

甜品方面，白桃流心蛋糕直情成個cake都係佢個樣嚟，要切開佢嚟食真係有啲唔捨得。口感軟滑，中間有白桃果蓉製成流心餡料，不過流心效果就唔算好澎湃。

邊個話冬天唔可以去海灘？AP鴨就去咗喇！沙灘上的Ahiru No Pekkle，係由即叫即焗嘅朱古力心太軟、日本直送remia雪糕同馬卡龍組成，一冷一熱，冰火交融。成個擺碟仲有種好疏乎嘅感覺添。

 日本千層蛋糕連Pitchi果凍

飲品方面，有凍飲Ahiru No Pekkle特飲配 Pitchi 果凍，亦有熱飲，咖啡仲有AP鴨拉花添~ 你哋要學識飲完個拉花圖案都仲留得喺度嘅特技喇。

精品方面，第一階段嘅有熱香餅 造型抱枕、手挽袋、陶瓷杯碟等等，AP鴨粉絲記住要帶夠錢先好嚟啊。

山下菓子
地址：旺角彌敦道700號T.O.P This is Our Place 3樓315號舖

文、相、片：Kar