疫情虽然有缓和迹象，但系港人外出用餐嘅意慾仍未完全回复。唔少受影响嘅食肆都推出优惠挽救，例如最近好多餐厅都纷纷转型推出任食放题，连现代风川菜、高质日式和牛烧肉、龙虾专门店及高级中菜厅通通都有份！
新派川菜馆 川流 
日式放题就食得多，川菜放题你又食过未？湾仔呢间走现代风嘅新派川菜最近推出$298晚市任点任食，每人可以享用两款前菜醋椒胡辣羹及家乡燻腊肉胡椒饼、主食二选一包括水煮鱼片或豆酥桂鱼、面食二选一包括担担面或文殊院甜水面外，90分钟内仲可以任食八款川式小菜！包括蒜泥本地黑毛豚白肉、回锅本地黑毛豚、宫保鸡丁、小笼包、鱼香茄子、麻婆豆腐、素煸花生芽及乾煸四季豆。用平时叫两三个小菜嘅价钱就可以任食真系好抵呀！
高级日式烧肉 和牛蕃
连日本和牛都有得任食！铜锣湾呢间烧肉店由东京名店「蕃 YORONIKU」创办人，名厨桑原秀幸主理，主打日山和牛。而家餐厅推出90分钟日本国产牛($388/位) 或日本A5和牛($488/位)放题，前者肉味浓厚，後者油花较重，不过选择$488嘅都可以食埋国产牛～另外放题仲包埋西班牙伊比利亚的猪腩肉及鸡腿肉，真系啱晒食肉兽。
图:性价比高台湾菜 南势角台湾牛肉面
最近无得飞台湾，可以食住台湾菜止吓瘾先。将军澳呢间台湾菜早前都推出咗$118放题，90分钟内任饮任食餐牌上所有菜式，选择有成38款主菜、小食同50款台式饮品，必试有汤底熬足十小时嘅招牌御品牛肉面、淮山杞子虫草花鸡汤及有六款口味拣嘅一口盐酥鸡等。
图:龙虾专门店 Red Lobster
呢间过江龙龙虾专门店有放题呀～香港店会於6月推出「Endless Shrimp」放题，虽然就唔系任食龙虾，但$198可以任食6款鲜虾美食，包括大虾意粉配龙虾酱、爆谷虾、夏威夷椰子虾、招牌蒜蓉虾、大虾手工薄饼及烤大虾，都咪话唔抵。不过为免浪费，每人每次只可点选任何一款鲜虾美食。
图:大馆中菜厅 The Chinese Library
点心放题大热！无论系主打亲民嘅酒楼抑或有米芝莲加持嘅中菜馆都齐齐推出点心放题，中环呢间位於大馆嘅艺术风中菜馆都唔例外，虽然系中菜馆，但装潢走西式典雅风。餐厅推出$298两小时周末午市点心放题，可以任食十四款点心，包括麻辣鱼柳包、黑蒜烧卖及羊肚菌水晶饺、松露山珍腐皮卷等。
文: Yanica
相: Tom Li / OpenRice会员
