佐敦新开抵食火锅店 $108任食肥牛海鲜加$1生啤(有片)
2017-10-20

开始凉凉地,打边炉嘅瘾又发作。佐敦有幢大厦咪好多火锅店嘅,最近又开多间新㗎。晚巿百几蚊任食,有肥牛有海鲜,都几抵,即刻同大家八下有咩食先!

嗱,佢分两part嘅,有啲肉类同手打丸之类,就落单叫,即叫即切;其余啲肠呀菜呀等等呢,就可以自己出去个雪柜度任拎。

首推油炸鬼酿虾胶,唔好渌太耐,虾胶熟咗就OK,渌完条油炸鬼仲系脆㗎。

仲有比目鱼!好少火锅店会有比目鱼拣,放入西班牙海鲜个汤底,啲味几夹,鱼肉好滑。花枝片亦够爽。

一碟牛拼盘有牛展花、牛脷托、一口肥牛粒同美国肥牛,系几精致嘅。不过啲肥牛,就唔多肥喇,略嫌细片咗少少,未必满足唔到牛魔王。

锺意内脏嘅话,猪肚、肥肠、鸭血等都有,爽口嘅,配辣锅应该几衬。

另外仲有好多其他嘢渌,例如:

鲜虾滑、鲜墨鱼滑、带子

青口

意式香草鸵鸟肉

五花豚肉、牛脷托

米线、油面、鸟冬

仲有,打边炉点可以冇嘢饮?汽水、凉茶任饮,想啤啤佢嘅都好抵,指定时段人头计每位第一杯生啤都系1蚊咋,另有买一送一优惠。但讲到最呃like,就点计都系坐落就会按人头送嘅七彩cocktail或mocktail,有青柠梳打、黑加仑子、菠萝乳酸等味。

呀,不过讲定先,甜品款式暂时嚟讲……就只得云呢嗱雪糕任唧。听讲话迟下会多啲款喎。

不过,呢间舖都已经足够令选择困难症嘅朋友头痕,事关佢汤底都有10款拣,仲有得玩双拼,啲款又每月都会转下。好多人都喜欢叫嘅系西班牙海鲜锅同自家制香辣锅,前者加入蕃茄去熬,所以除咗有海鲜嘅鲜甜味之外仲有微微嘅酸味,几开胃。比较特别嘅就有花果茶酸辣锅同绿茶青木瓜汤,不过如果系女生,通常都会锺意人蔘白肉锅,滋补呀,蔘味几出㗎。

调味酱料又有10几款咁,除咗一般嘅豉油、麻酱、生蒜等,仲有黑松露酱、蚬肉芥末酱等,特别推介自家制香辣酱畀锺意食辣嘅朋友,辣度适中,既能吊味又唔会抢味。

温馨提示一句,想食嘅最好预先订咗位先呀,佢分几个时段,几个价钱嘅,最後嗰场,夜鬼可以打到凌晨三点半呀喂。

蒲头岛
地址:佐敦弥敦道219号庄士伦敦广场10楼


文、相:Kar


关键字
佐敦
火锅
海鲜
任食
啤酒
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
7天前
【2021生日优惠】持续更新!7月寿星半价叹和牛烧肉套餐
2021-07-09
【恭喜张家朗】多间餐厅立即推出限时优惠一览
今天
榴槤Buffet真的很兴奋~ 九龙区酒店7、8月限定榴槤盛宴
2021-06-30
尖沙咀新开烧肉Omakase 专人烧日本A5和牛+特级宝盒钻石肉
2021-06-28