終於畀各位甜魔等到喇！紐約人氣甜品店上年登陸香港時，未有帶同佢哋最受歡迎嘅甜品：棉花糖雪糕過嚟，不過最近佢哋喺中環開旗艦店，終於有得食喇！兩個禮拜限時限定，粉絲要食就快喇。

旗艦店分外帶區同堂食區，地方寬敞，門口有高身落地大玻璃，感覺時尚。大家最期待嘅紐約人氣甜品Frozen S’more，嚟到香港改咗個貼地新名——焫焫焫焫著棉花糖雪糕。（喂，有聲嘅~）插喺煙燻過嘅柳木枝上嘅棉花糖即叫即燒，快手影完相好即刻食喇，棉花糖雪糕唔等人㗎。棉花糖外層有微微焦香，軟滑帶暖，半溶狀態令到甜味倍加，一啖咬落去，中間除咗有自家製嘅雲呢嗱雪糕，仲有層朱古力薄脆，完全係一路叫住好肥好甜但又忍唔住食完一啖再一啖嘅邪惡甜品。新店限定兩個禮拜咋留意返，最後供應日期係6月20號。

新店另外仲有幾款新品，其中造型成粒花生咁嘅沙嗲牛肉花生燒，同樣只係旗艦店限定。花生外層係窩夫嚟，趁熱食會有微脆口感。入面包住以自家秘製沙嗲醬調味嘅港式沙嗲牛肉，仲有醬汁畀大家隨意淋，沙嗲味都幾濃郁，夾雜住花生碎粒，更加香口。

另一款旗艦店限定供應嘅鹹點係煙肉生菜番茄三文治，用料配搭經典，但製作時亦有花小心思。加入蒜蓉蛋黃醬，煙肉亦加咗層香脆焦糖，帶有陣陣甜香，口感豐富，最啱附近返工嘅朋友仔買返份做lunch。

紅肉火龍果撻真材實料，真係成嚿新鮮紅肉火龍果肉放咗落個撻度，撻底以牛油酥皮摺疊而成，再有層薄薄地嘅雲呢嗱吉士醬，口感香脆鬆化，牛油味香而果肉不失清甜。

佢哋一向擅長做牛角包，採用紐約總店飼養咗9年嘅天然酵母，加埋法國麵粉、牛油製作，今次更將牛角包進化，創作咗「牛角包吐司」。方形嘅海鹽牛角包吐司同圓柱形嘅楓糖牛角包吐司，一鹹一甜，兩者同樣酥香，內層鬆軟。

當文歷餅店 by Dominique Ansel
地址: 中環皇后大道中80號H Queen’s地下2號舖

文、相、片：Kar