呢间本土扒房专注做平铁牛扒，牛肉控就算未食过都应该听过。佢哋中环店为咗畀大家多啲选择，更融入猪肉料理，所以店名後面加咗「Pig Pig Pork Pork」嘅缩写「PPPP」。而且选取猪肉食材亦好似牛扒咁采用特别部位，例如用「猪羽毛」制作高质猪扒～
猪肉会用红色碟上
一份猪羽毛开到6-8件约300g嘅猪扒
咪以为「猪羽毛」系餐厅想引人注意而改嘅名，其实系西班牙黑毛猪左右肩膊上两块小猪柳pluma，呢个部位范围唔大，所以都几珍贵，而佢嘅形状好似羽毛，所以有「猪羽毛」呢个别名。
西班牙黑毛猪猪羽毛（$268）
猪羽毛喺炭炉烧一阵再用铁板烧，令肉沾上「火」嘅味道，食落有油香又唔会好肥腻，软滑有咬口，蘸少少盐已经好够味。而烧过嘅桃香甜又有少少果酸，一齐食可以中和猪肉嘅油分。
Just Burger（$188）
Just Burger系双层猪肉汉堡，配自家制手打100%猪肉汉堡扒，冇加入其他肉类㗎。汉堡扒煎到微微焦香，口感弹牙；配搭蔬菜、Monterey Jack同American Cheese两款芝士外，重有味道似蜂蜜芥末酱嘅自家制酱汁，咸中带甜，味道层次丰富。
是日特别版招牌平铁牛扒（$238）
话晒呢度嘅主打菜式系牛扒，都要带啲新意畀大家嘅。每日限量供应嘅是日特别版招牌平铁牛扒，先慢煮4个钟令成块肉嘅软嫩程度平均啲，之後再烧香表面，口感几香软。 另外特别自家制清甜嘅粟米汁，吊起肉嘅盐味，感觉亦清爽啲。
USDA Prime Flat Iron配W’s秘制法式香草牛油汁 （$288），暂定供应到2月尾
另外，USDA Prime Flat Iron配W’s 秘制法式香草牛油汁，系联乘2017年结业嘅法式牛扒屋W's Entrecôte一齐创作嘅期间限定菜式。配搭嘅「W’s秘制香草牛油汁」由W's Entrecôte主理人制作，用龙蒿、茴香、迷迭香、百里香等几十种香草同大量牛骨熬煮，香滑又有肉香，令牛扒嘅味道更浓郁。
每个主菜依然配任食薯条
藜麦沙律配自家靓汤（$60）
虽然所有主菜都配任食薯条，但想丰富啲亦有side dishes可以拣。锺意多啲蔬菜平衡下嘅话，藜麦沙律配自家靓汤系唔错嘅选择。沙律面头加咗蟹肉，味道鲜甜；而自家靓汤每日用大量蔬菜制作，入口好顺喉。
是日小食（$70）
而是日小食则有自家制蟹饼同洋葱圈，当日出边款就按来货而定。其中蟹饼一件大约40g，入面嘅蟹肉馅捞咗芥末酱同洋葱调味，咸咸甜甜好香口，唧埋柠檬汁就更提味。
店主特别引入波尔多列级酒庄嘅红酒（$130/杯）
餐厅设计充满现代感
门口攞飞重好似喺ATM揿钱
Top Blade Steak Lab VS PPPP
地址: 中环士丹利街11号Stanley 11地下
文、相：Cathy.C