连组合Error肥仔都系佢哋粉丝嘅旺角人气居酒屋,最近喺铜锣湾开咗新分店呀!新店同样以木系装潢为主调,暗暗der灯光颇有气氛,仲有个月球下嘅狮子山剪影布景。食物方面,有多款当店限定嘅新菜式(系呀,旺角冇㗎),当中有两款更以鹿儿岛A4和牛制作!
(左)吉列苹果豚肉卷、(右) 吉列千层豚肉(三重芝士)
贪新同时都要念旧,镇店招牌菜吉列豚肉当然有得食。之不过平时成日食三重芝士版,系就系又爆芝又拉丝好吸引,但就忽略咗另一个潜力股——吉列苹果豚肉卷~ 一样都系以日本栗饲豚腩肉制作,薄薄一层炸粉好香脆,猪肉嫩滑,夹住嘅苹果用咗肉桂炒香,闻落好似苹果批,食落多咗份香甜。
申子和牛烧
而众多款新菜式中,大大力推介申子和牛烧,一大片鹿儿岛A4和牛上,放有日本鸡蛋同北海道七星米,店员会即席喺客人面前以火枪烧制,再拌匀蛋黄,以和牛卷起沾满蛋汁嘅饭就食得喇。视觉嗅觉味觉都各自得到满足,即烧即食仍然带有微暖,和牛软滑入口溶化,散发出满满油脂香同蛋香。
鹿儿岛A4和牛茶渍饭
另一款和牛菜式系鹿儿岛A4和牛茶渍饭,汤底用咗6只无激素鸡去煲14至18个钟,所以出嚟无论系色泽定味道都好浓郁,仲好清甜𠻹。睇住以热汤淋熟嘅和牛慢慢变色,半熟嘅状态令佢口感更加软滑。
极上蟹膏蟹肉炖饭
蟹迷唔好错过极上蟹膏蟹肉炖饭,打开蟹盖就会见到松叶蟹膏蟹肉同蟹籽,绝无欺场。而饭粒亦带有微微嘅淡橙色,原来系用龙虾汤煲炖㗎,知佢咩料啦~ 精华尽吸,所以啖啖都系鲜甜嘅感觉。
明太子天妇罗
餐厅亦特意独家引入多间日本小型酒厂嘅清酒,有清甜嘅、有带果香嘅、有微辛嘅……畀香港人可以试到更多别树一格嘅手造清酒风味。有靓酒,当然都要有佐酒小食啦~ 同样系新店限定嘅明太子天妇罗就衬到绝喇。真材实料,用足原条日本明太子去炸㗎,就咁食可能会觉得咸香味略为浓咗少少,但食一啖再饮一啖酒就啱啱好,仲有少少微辛余韵,或者呢啲就系wine pairing有趣嘅地方。
日式制鲜鲍鱼、日式特制鹅肝
日式制鲜鲍鱼同日式特制鹅肝同样充满独家嘅特色,两款分别用上秘制酱汁腌渍、处理,前者鲜甜爽口,後者加多片自家制腌萝卜夹埋一齐食,软滑得嚟多咗层爽脆感觉,仲有淡淡柚子微酸嘅清香中和腻感。
其中两款独家代理清酒(即将供应)
申子居酒屋
地址:铜锣湾渣甸街50号渣甸中心9楼
文:Kar
相、片:Wilfred Chui