九龙湾德国主题圣诞巿集开锣 多款小食及啤酒 首推黑啤蛋糕
2018-11-05

虽然仲有成个几月先到圣诞,但系啲圣诞巿集已经陆陆续续开锣啦,就好似九龙湾呢个商场咁,今日开始有巿集行啦。以德国做主题,除咗有好多只可爱嘅泰迪熊仔之外,仲有好多德国小食同啤酒,当中黑啤蛋糕更加系全港首卖添。就等开饭仔同大家提早过圣诞,睇下呢度有咩食先:

讲起德国,梗系会谂起咸猪手啦,呢只咸猪手用秘制腌料腌足3日㗎,相当入味。70蚊就可以食到半只。同档仲有即场制作嘅巴马臣芝士意粉,睇住啲意粉喺大大嚿芝士上面捞下捞下,都咪话唔治癒。

行过隔篱档,就有一个个嘅牛角包卖。望真啲,有两款嘅,一款系龙虾配意大利黑松露,另一款系龙虾配德国粗粒芥末,睇下你想要香口定香辣啦。

小朋友或大细路应该最锺意呢档,因为有好多德国软糖夹呀。七彩缤纷咁,有啲仲要系果肉软糖嚟,以原味果汁制嘅,粒糖入面真系有果肉㗎!另外仲有啲冇果肉,但咬开有果酱,一样咁开心。

呢档有好多款口味嘅糯米糍,如果你话芒果呀紫薯呀嘅味你已经食得太多,咁就要试下佢哋嘅新口味啦~ 最新奇嘅系德国黑啤味!佢哋用咗黑啤制成啫喱粒粒混入糯米糍度,味唔重唔会醉啦,但有丝丝麦芽味咁啦。另外仲有德国特浓朱古力、黑松露同车厘子味都系新出。

黑啤除咗可以用嚟整糯米糍,仲可以整蛋糕?!呢间人气芝士蛋糕店,就研制咗只德国黑啤戚风蛋糕喇。顶层系黑啤啫喱,呢层最重味,够晒香甜,跟住就有啲黑啤忌廉同埋朱古力海绵蛋糕,都几有惊喜。不过暂时系得呢个巿集先有得卖咋。

酒鬼应该唔会满足於咁微量嘅啤酒,呢只德国手工啤酒由有机认证嘅麦芽同啤酒花酿造,虽然系IPA但唔会好苦,麦香中渗透住阵阵柑橘果香。

点少得德国传统圣诞饮品?即系Mulled Wine德国热红酒呀!用德国红酒加有机肉桂条、丁香、大茴香、小茴香等制,饮落温和、顺喉,仲有多种功效添,例如暖胃止痛、补血、养颜等,啱晒各位女生。

最後要介绍样特别嘢畀大家,Moscato 配鲍鱼!好多女生本身都锺意饮Moscato,贪佢甜吖嘛,但有冇谂过原来Moscato可以配埋鲍鱼咁饮?上环有间海味店引入咗只果味香甜嘅Moscato,建议大家可以倒出嚟,浸住只鲍鱼半分钟左右再饮,呢个时候嘅Moscato就会变咗带有鲜味,最尾余韵仲会有少少salty嘅感觉,好得意。当然,只鲍鱼亦变甜咗啦。

德国主题圣诞巿集
地点:德福广场1期中庭


文、相、片:Kar

关键字
九龙湾
圣诞节
圣诞巿集
甜品
蛋糕
手工啤酒
饮食潮流
开饭仔为大家发掘香港这个美食之都的最新美食资讯,分享饮食潮流文化。
本月热门
【随时更新】零食速报 每周新款零食、酒品点评
7天前
全城抗炎!送上门懒人煮食包及套餐大合集2.0 花胶炖汤/火锅/铁板烧
2020-10-07
本地搵食有着数!OpenRice x 旅发局 合推 5折餐饮券+餐饮礼遇
2020-09-21
悠闲早晨 3间英、澳、日Brunch推介
2020-09-21
滋味到家!新鲜海野海鲜+逾200款蔬果肉类 食材直送上门网站推介2.0
2020-10-08