一班朋友食飯要唸食咩就最煩，始於口味唔係人人一樣，有人鐘意食肉，有人鐘意健康啲，咁中環呢間新開嘅餐廳就幫到你啦。負責人覺得，而家香港中上環區就仲未有一間餐廳可以飲吓酒Chill下，同時又可以食飽飽嘅地方，所以就開咗呢間以地中海菜為主嘅餐廳，有齊哂肉類、海鮮同素菜食，素菜仲要仔細到分埋vegan同vegetarian添！

裝修都幾有特色，如仿莫斯科地鐵站嘅拱形天花、古花窗玻璃鏡同藝術品裝飾，酒吧就以管風琴為設計靈感。

海鮮類香煎蟹餅配紅桑子醬($138)，外層好香脆，蟹肉都鮮甜多汁，配埋紅桑子醬食就開胃啲。馬爹那酒煮美國蜆($178)，蜆肉好新鮮，青色醬汁係用咗義大利莎莎青醬,、maserira 酒同羅勒製成。

帶子青口海鮮意粉($188)，海鮮有帶子、青口同蝦，全部都好爽口同大隻。意粉係Al dente style，食落唔會太腍，仲有少少咬口，而且仲係自己手工製添！燴地中海式紅蝦海鮮湯($348)，以多款海鮮同新鮮蕃茄熬製幾個鐘時而成，湯汁好鮮甜！

另外食肉獸都有大把選擇，香烤美國肉眼扒($428)，熟成程度啱啱好，而且仲係美國農業部認證嘅極佳級牛肉。法式烤春雞(半隻) ($238) 用咗真空低溫烹調法，所以食落都幾滑，配埋底層嘅南瓜蓉一齊食味道就更豐富。

餐廳都有提供素菜同純素菜單，烤大啡菇純素芝士漢堡($148)係用大啡菇代替漢堡，食落一樣咁惹味，而且仲無咁heavy。

甜品方面都好有心思，好似呢個奇亞籽意式奶凍($68)，放咗而家最流行嘅奇亞籽落甜品度，增加口感之餘又無咁邪惡。香濃花生醬軟雪糕配蘋果雪葩($68)，真係有濃濃嘅花生醬味，覺得膩嘅時候食啖蘋果雪葩中和返就啱哂！

另外餐廳仲有多款cocktail，全部都易入口啱女仔飲。而且連餐具都做到好仔細，唔同區域嘅位置餐具顏色都唔一樣架！

AHA Restaurant & Bar

地址: 中環威靈頓街 198 號The Wellington地舖

文：Yanica

相、片：Tom Li