每年都總有啲大熱甜品，前一兩年係梳乎厘班戟，今年應該就係巴斯克蛋糕喇！呢款帶有焦香嘅芝士蛋糕，深深咁吸引住各位甜品控。最近有間新開嘅西班牙蛋糕餅店，就以佢為主打啦~ 除咗原味之外仲有其他唔同口味。
餅店源起，原來係嚟自人氣餐廳Doubleshot by Cupping Room，因為巴斯克蛋糕喺佢哋餐廳太受歡迎啦，於是團隊就創立咗呢個專門製作蛋糕嘅品牌。原味嘅巴斯克焦香芝士蛋糕係必然之選，餅店特意選用法國芝士同日本雞蛋等高級食材，每日新鮮製作。面層嘅焦糖烘面有陣陣突出嘅焦香，蛋糕香軟幼滑，芝士味香濃，令人忍唔住食完一啖又一啖。蛋糕有6吋版同3吋版，搵多幾個朋友仔一齊開心share都得。
細細個嘅伯爵茶味巴斯克芝士蛋糕係餅店首個研發嘅新口味，加入伯爵茶茶葉製作，蛋糕表面亦見到點點茶葉，食落當然有陣陣茶香滲出啦，不過呢款口味嘅芝士味就冇原味咁突出，相對上淡啲啲，感覺亦冇咁膩。
餅店另外有多款loaf cake供應，味道包括清新嘅Classic Lemon & Poppyseed、帶有茶香同花香嘅Earl Grey & Floral Rose，同長青組合Matcha & Azuki。抹茶控一定會鍾意最尾呢款，因為成個蛋糕嘅抹茶味都好濃郁，特別係面頭嗰啲抹茶醬呀，甘濃得嚟又有啲甜，口感鬆軟，好食呀。
丹麥酥都係佢哋嘅招牌糕點，牛油味重，啖啖酥脆，而且更係由曾喺酒店擔任過麵包總廚嘅師傅製作，品質自然有保證。
由於餅店以網上商店為主打經營模式，各位想食嘅朋友仔，建議最好就喺網上預訂咗先啦，因為暫時每日都好快賣晒呀。
La Viña
地址：中環嘉咸街23號My Central地下3號舖
文：Kar
相、片：Tom Li