想唞個氣放鬆一下，搵間悠閒酒吧坐低，飲啖雞尾酒，俯瞰下城景，都係個唔錯嘅選擇。最近喺中環就有個咁嘅新地方啦。
餐廳位於中環一幢大廈嘅28同29樓，兩層風格截然不同，下層係法日料理fine dining，上層係感覺輕鬆嘅酒吧餐廳，兼且有個露台添。坐住喺張好舒服嘅梳化度欣賞下香港嘅城景，黃昏時仲可以見到一抹晚霞，心情都好啲relax啲。
由著名意大利籍酒吧經理Jonny Amir主理，以Zest Heritage雞尾酒系列為主打，杯杯又又靚又獨特。好似Quinine咁，係由西班牙氈酒、白桃利口酒、白砵酒同焦蜜糖等調製而成，焦蜜糖更係直接以火槍喺蜂巢蜜中提取出嚟呢。不過即使加咗蜂蜜，但又冇想像中咁甜喎。
如果想要甜啲fruity啲嘅，就揀St. Tropez啦，由Kir Royal配埋香檳、藍莓、白桃利口酒調成，面頭鋪上自家製柚子魚子醬，酸酸甜甜咁。至於成塊黑白朱古力蓋面嘅係Voyage，飲落有淡淡嘅威士忌香，酸酸地又有啲煙熏味，如果咬啖朱古力再飲，個feel又唔同咗，層次好豐富。
呢度又唔係淨係得酒飲嘅，有lunch set㗎！想豪少少咁嘆個lunch可以要個雜錦刺身丼便當，有多種新鮮角切刺身包括吞拿、鮨琥珀等，仲有兩大隻甜蝦，配埋柚子醋沙律、漬物、味噌湯同甜品，都咪話唔飽。
生薑日本醬油烤茄子亦好吸引，好大條茄子啊，先微微炸過，再用生薑同日式醬油搽上去烤焗，幾香口。
而黃昏起則會供應多款佐酒小食，飲酒最夾嘅當然係芝士同凍肉platter啦，仲有埋鴨肉鴨肝醬添，鍾意blue cheese嘅朋友唔好錯過。
想飽肚啲有鴨肝鰻魚漢堡，想要輕食少少嘅，就可以諗諗紅鰭吞拿魚西瓜串或者新鮮油甘魚配自家製和風柚子醋，前者清爽開胃，後者有小清新之感。
ZEST by Konishi
地址：中環安蘭街18號28及29樓
文、相、片：Kar