中环高质Omakase寿司/铁板烧 大只生蚝+鲍鱼Risotto+ A5和牛牛肉厚烧
2021-02-04

新一年除咗要继续努力防疫,亦要活在当下呢,有好嘢梗系要食咗先啦~ 落兰桂坊唔一定去劈酒嘅,可以去呢间高级日本料理享受返一趟「日本味之旅」。餐厅主打铁板烧同寿司,供应多款日本直送嘅鱼类同海鲜刺身,仲有和牛。

先介绍一下佢哋嘅Omakase寿司套餐,包括咗时令前菜、刺身8款、季节蟹料理、手握寿司8款、鲍鱼意大利饭同埋汤物、渍物加水果,非常丰富。

 苹果木燻鲣鱼 + 拖罗二食

 生蚝、慢煮八爪鱼(左)、间八配赤贝、海胆及左口鱼二食(右)

师傅对於食材嘅运用,相当花心思,8款刺身都以唔同嘅方法去处理。例如以熟成咗一晚嘅间八包住赤贝同海胆,喺面层加上乌鱼子,鱼香满满之余仲有啖啖鲜味;鲣鱼以苹果木香燻过,香气扑鼻;拖罗同左口鱼亦有二食。生蚝仲大大只,又饱满又爽脆!

 梭子鱼寿司(左)、鮟康鱼肝配最中饼(右)

手握寿司亦同样见心思,选用口感软糯而饭粒分明嘅越光米,再按照唔同鱼类嘅特性配搭赤醋或白醋。烧过嘅梭子鱼加埋芥末籽酱,肉质肥美带焦香;较浓味嘅鮟康鱼肝则配上最中饼,可中和油腻感。

 鲍鱼意大利饭

最吸引嘅应该系鲍鱼意大利饭喇,选用澳洲大头鲍,混入鲍鱼肝酱去制作,珍珠米都做到好似risotto有嚼劲嘅口感,啖啖浓香,尽吸鲜甜精华,仲有粒粒鲍鱼食到添。

至於喜欢铁板烧嘅朋友仔,唔使羡慕,铁板烧套餐同样有满足感。红藤套餐包括前菜拼盘、刺身3款、鸭肝配红酒啤梨汁、北海道虾夷鲍配海胆汁、香煎龙虾配招牌酱汁、雪葩、A5和牛牛肉厚烧、海胆炒饭、炒野菜,同埋汤物、渍物加水果。

 鸭肝配红酒啤梨汁

其中,鸭肝配红酒啤梨汁层次丰富,厚切嘅鸭肝阵阵甘香,沾一沾师傅调配嘅红酒啤梨汁,连埋薄脆多士一啖放入口,绝对可以中和返腻感,保持战斗力。

 北海道虾夷鲍配海胆汁

北海道虾夷鲍配海胆汁则系一道颇考功夫嘅菜式,坐喺铁板烧台前望住师傅整,就更加能感受到佢嘅复杂。以大大片嘅海带盖住鲍鱼,加大量食盐再落埋白酒,焗一焗,最後淋上菇菌汤同海胆汁,仲有大根托底,卖相精美,味道清香,可以食得到原有嘅鲜甜。

而牛魔王最期待嘅一定系A5和牛牛肉厚烧,建议先食一粒原味嘅,感受佢喺口中慢慢融化同埋油香,之後先再按个人喜好加盐或炸蒜。

 海胆炒饭仲有饭焦添!


T8 Japanese Cuisine
地址:中环兰桂坊15-16号协兴大厦5楼

   

文:Kar
相、片:Tom Li

关键字
日本菜
厨师发办
omakase
中环
铁板烧
寿司
新店直击
走在最前线,为大家搜罗及报道有关新开餐厅的资讯。
餐厅资料
本月热门
【随时更新】零食速报 每周新款零食、酒品点评
5天前
【2021生日优惠】持续更新!5月食日本直送海鲜送西班牙红/白酒
2天前
【最平$298最贵$938】佐敦新开日式和牛烧肉放题 独家引入鹿儿岛小田和牛
2021-04-09
带妈妈味游异国!母亲节Brunch六选
2021-04-20
3月份好评餐厅十强
2021-04-08