喺開中環蘇豪區搵食嘅食家們，應該都對呢間以鮮奶麻糬聞名嘅人氣台灣菜Check-In Taipei唔陌生。最近餐廳為慶祝餐廳六週年紀念，除咗裝修以全新面貌文青風格示人，仲推出多款嘅新菜式，新餐牌都係以台灣熱門食店嘅著名菜式作靈感再加入自己創意，太想念台灣味道嘅朋友又多一個好去處啦。
招牌牛肉麵（刀削麵）
牛肉麵係每間台灣餐廳都必有嘅招牌菜，今次推出嘅牛肉麵特別加入秘制辣牛油，加入辣牛油後牛香味濃帶些微辣，客人可因自己口味加一至兩羹。而且湯底都同以前嘅牛肉麵有唔同，以往會加藥材同香料，但為咗突顯辣牛油香氣，新湯式用50斤牛骨熬製12小時或以上，味道就清甜啲。另外為咗增添口感，仲有埋炸蟲草花及好索湯嘅台式百頁豆腐。
先將大量牛脂肪煮至純牛油，然後加入十二種香料及辣椒去調味，室溫放置後就會變成牛油般嘅質感。
髒髒鹹蛋黃芋泥蛋餅
蛋餅同樣堅持用鴨蛋提升蛋香，芋泥蛋餅選用台灣芋頭，餡料係滿滿嘅芋泥，上層加埋紫薯粉、鹹蛋黃碎及煉奶，甜而不膩，無論視覺定味道都好吸引。
薯泥起司松露蛋餅
喺香港食蛋餅，餡料都不外乎係肉鬆、粟米芝士等，今次就推出坊間少見啲薯泥餡料，其實薯泥餡喺台灣都幾普遍，呢道就混合少少西餐元素，加埋黑松露醬味道就更豐富啦～
鹹蛋黃芋泥乒乓球
同樣都係鹹蛋黃同芋泥嘅組合，將鹹蛋黃芋泥球炸成乒乓球狀，加埋自製純鹹蛋黃醬，同樣啱相機食先。
麻婆豆腐手工餃
靈感來自台灣最近好HIT嘅麻婆豆腐小籠包，水餃由台灣直送，餡料係豬肉高麗菜，配上惹味嘅麻婆豆腐汁又幾夾。
地址: 中環蘇豪荷李活道27號地舖
文、相、片: Yanica