中環Soho區突然出現一部超大Game Boy，而且仲真係可以玩？原來係兩位八十後以機舖做主題開咗間港式小食店，生炸雞髀、彈牙白魚蛋、燒賣等配自家製惹味醬汁，定價又夠大眾化。無論係飲完兩杯想去篤串魚蛋，定係想試下食住小食打街機嘅滋味都得呀。
操場小食部單係個名就夠令人會心一笑，扮舊式遊戲機中心嘅招牌、食鬼霓虹燈、加上部成道門咁高嘅Game Boy，中學回憶一秒返晒嚟！加上部Game Boy其實真係可以畀大家打機，只要消費滿$50，畀$100按金就可以借手掣啦！
炸戰斧雞髀（$35）
打機前先醫肚！大大件雞髀先醃過夜，收到Order再生炸，所以要等大概15分鐘呀。不過絕對值得等，炸髀皮薄脆肉Juicy，Keep到肉汁而唔會太油膩。而且醃料亦相當入味，秘密武器之一係醃嘅時候有落到天津玫瑰露酒。
炸彈人（$15）
名就夠搞笑啦，炸彈真身係白雪雪魚蛋，食落彈牙爽口。可以加店家自己調配嘅咖喱汁、沙嗲汁、麻辣汁、椒鹽或者蜜糖，而白魚蛋配鹹鹹地有花生香嘅沙嗲汁就最啱。
食鬼燒賣（$10）
$10就食到一串燒賣，中環Soho區嚟講真係算幾抵。部分小食可以選擇炸定唔炸，燒賣係其中一款建議大家揀炸嘅，炸完外脆內軟糯口感更豐富！開飯仔就揀咗加椒鹽，夠鹹香。
爆裂牛筋丸（$15）
牛筋丸同樣可炸可唔炸，爆裂就無喇，不過入口就有少少爆汁效果！彈牙有牛肉香嘅牛筋丸配麻辣汁，惹味香口。
小店逢星期四至六仲開到凌晨四點，以後一班Friends飲酒唔單止可以送花生，仲可以嚟呢邊篤魚蛋啦。
操場小食部
地址：中環荷李活道23號金珀苑地舖
文、相、片：Cathy