仲有一個月左右又到萬聖節，各位嘩鬼又係時候準備出動喇！同米奇米妮玩完鬼屋之後，想填肚做飽鬼嘅都有幾個選擇，酒店同各區餐廳都有唔同嘅餐單，嘢食造型全部都鬼死咁可愛！

迪士尼酒店 – 華特餐廳

萬聖節去食返個酒店級嘅三層架下午茶都唔係好過份啫，可？鹹食甜食都有：焗雜菜批伴紫甘荀忌廉汁燴蟹肉、鮮蝦甜薯千層酥、焗芝士辣椒牛肉撻、荷蘭汁海鮮撻、黑松露忌廉芝士煙三文魚卷同南瓜籽、朱古力曲奇等等，樣樣都細細件細細件咁，可以有quota食多幾款嘛。另外仲有個印住Jack樣嘅朱古力海鹽焦糖蛋糕~

美國小鎮大街 - 大街餐廳

美國小鎮大街間餐廳，啲嘢食全部都好應節下，一係就變晒蝙蝠樣，一係就直情用南瓜嚟泡製咗杯「南瓜小熊奶昔」。

幻想世界區 – 皇室宴會廳

幻想世界就有阿Jack、米奇同米妮嘅cupcake，好cute cute，粉絲見到嘅尖叫聲，分分鐘仲尖過玩鬼屋嗰陣。

巿集餅店

而巿集餅店就以曲奇為主，繼續都係老是常出現嘅阿Jack同南瓜樣~ 冇計啦，佢哋係萬聖節嘅主腳嘛。

戶外小食亭

真係要講返句，last but not least，喺戶外小食店除咗可以買到吸血米奇爆谷桶同綠魔特飲之外，仲有呢把好鬼型嘅星戰光劍呀！即係綠茶churros嚟，但真係好鬼型，買完會拎住係咁玩係咁影相，但就偏偏係唔肯食囉。