開心果控請注意！歷山酒店餐廳今個夏天特別推出「仲夏開心果下午茶」，由鹹點到甜品都係以香脆開心果作為靈魂主角，無論視覺、嗅覺與味覺都做到三重享受，絕對係一場讓人心情變靚嘅味蕾之旅。

「仲夏開心果下午茶」由多款鹹點與甜點組合而成，再加上無限添飲嘅咖啡或Tea WG茗茶。每份下午茶更附送兩杯指定酒精飲品，包括紅酒、白酒、氣泡酒或開心果泡沫鮮奶。

如果想開場小酌嘅話，可以叫返杯氣泡酒打頭陣，氣泡細緻清爽，開胃又清新，作為引子剛剛好。開心果泡沫鮮奶則帶淡淡奶香及果仁香，入口絲滑。

每件鹹點都有精緻造型與層次感，又靚又好味。

鴨肝慕絲開心果撻

鴨肝慕絲順滑得如奶油，入口即化。撻底香脆，面頭鋪上開心果碎粒，鹹香與果仁油脂味融合得天衣無縫。

挪威煙三文魚開心果忌廉芝士卷

外型精緻，煙三文魚配埋軟滑嘅開心果忌廉芝士，帶出輕微堅果鹹香，味道平衡而唔膩。

北海道帶子伴開心果碎椰子忌廉

帶子鮮甜，煎得微焦，配搭輕盈椰子忌廉，帶出開心果碎嘅香脆質感，口感層次分明。

開心果蜜糖羊奶芝士伴無花果

呢道菜最驚喜，羊奶芝士略帶鹹香，蜜糖與無花果甜中帶微酸，結合開心果嘅果仁香，非常滋味。

每道甜品都滲入開心果元素，但風味完全唔重複。

開心果鬆餅配芒果醬

鬆餅外脆內軟，伴以輕盈開心果忌廉與微甜芒果醬，甜而不膩。

班蘭咖央西多士配開心果醬雜果仁

結合港式西多士與東南亞風味，極具新意。班蘭與咖央香甜細緻，開心果醬增添堅果香，果仁口感十足，係創意之作。

杜拜朱古力撻

黑朱古力味濃郁，帶少少回甘，配合中間微鹹開心果仁蓉，食落竟然唔衝突，反而充滿層次。

士多啤梨開心果拿破崙

鬆化酥皮之間夾有香甜忌廉及酸甜草莓，配搭開心果蓉做裝飾，外觀討喜，風味豐富。

大家可以無限添飲Tea WG多款茗茶及咖啡，飲品選擇豐富，推薦皇后茉莉綠茶與法式伯爵紅茶，花香與茶香交融。咖啡則有卡布奇諾、拿鐵、美式等選擇，香氣撲鼻，最啱配甜品！

香脆鹹點、清新甜品，加上高質酒水與茗茶、精緻空間與氛圍，仲夏開心果下午茶的確係今夏不容錯過嘅一站！