【識食攻略】米芝蓮推介椰子燉湯每日新鮮燉製

你有幾耐冇飲過一碗真正暖入心嘅靚湯？喺香港節奏急速嘅生活中，想喝到無味精又真材實料嘅湯水越嚟越困難。但原來，喺鬧市之中，有一間以原盅椰子燉湯聞名嘅小店【椰小盅燉湯專門店】，全店湯品皆「零味精、零鹽、零糖」，開業一年半即榮獲《米芝蓮指南》推薦。

店主為咗研發出穩定又鮮美嘅椰子燉湯，用足成年時間每日試飲、調整配方，總共試咗過百次，務求做到每一啖都原汁原味。佢哋最大嘅賣點就係用整個新鮮椰子入饌，將湯放入椰殼內慢火燉足數小時。燉湯過程中，湯汁吸收椰子天然清香，入口鮮甜。

織金竹笙烏雞椰小盅呢款湯非常適合女士飲用，功效包括益氣養血、美容養顏。材料有烏雞、杞子、淮山、紅棗、大竹笙。湯色清澈，喝落去不但有椰香，更帶微微中藥材甜味，滋潤得嚟唔滯口。飲完一整盅，成個人暖笠笠。椰皇內層嘅椰肉更可刮出嚟食，口感滑溜又天然，絕對唔浪費。

如果你鐘意肉味濃啲，織金竹笙子排椰小盅會好啱你。啖啖椰香中帶住排骨嘅甘甜，排骨燉到一夾就甩骨，肉汁豐富。竹笙大大條，增加口感層次。

除咗湯品，餐廳亦有甜品小食，推介手工芋圓，每一粒都煙韌彈牙，甜度適中又夠天然，最啱配完湯後歎番碗，畫龍點睛！而金脆鮮奶椰小凍唔會太甜，帶淡淡鮮椰香，質感輕盈，為成餐劃上完美句號。

店內座位雖然唔多，只有四至五張枱，但正正呢份細緻同溫馨，令人有種返屋企飲湯嘅親切感。繁忙嘅都市人冇時間自己煲湯，【椰小盅燉湯專門店】就提供一個可以快速滋補、安心歎湯嘅選擇，難怪成日爆場。