難得來到大閘蟹季，當然要來一次甚至幾次蟹宴，食返個夠本啦！但如果唔識揀，味道差事少，浪費quota事大！為了唔好掃走蟹興，專誠向酒店中菜大廚請教，揀靚蟹有咩秘訣密技？處理蟹又有咩小貼士？揀隻靚蟹，處理得宜其實唔難！

揀蟹篇

1, 眼仔碌碌

同人一樣，炯炯有神嘅雙眼就代表精神！殘忍少少試吓輕輕篤佢對眼，如果仲識得縮，就是好蟹子！嘔泡代表呼吸頻繁，亦是有活力的表現。

2, 墜手結實

「青背、白肚、黃毛、金爪」，蟹背要青綠、肚潔白、蟹螯及爪上的絨毛呈啡黃色，爪尖帶金黃色。拎上手要有咁上下斤兩，蟹身結實，如拆開水草，蟹仔立即張牙舞爪，即係生猛啦！亦可以留意蟹腳關節位，頂黃亦會帶黃色，表示蟹油豐富。

3,留意時令

今年為閏六月，當造期較遲，應該九月尾後，大閘蟹會更靚更肥美。俗語說九月圓臍十月尖，農曆九月吃雌蟹，十月食公蟹就最好不過。

清洗篇

用牙刷最好，清水沖淨後先刷蟹蓋、蟹爪，再要刷蟹鉗位的毛及污泥，關節位及邊位。蟹肚上亦易藏有污物，盡量刷淨。最乾淨係拆開水草仔細清潔，之後再綁起來蒸，但蟹一大解放就會郁動四處抓，要小心別被鉗親！

蒸蟹篇

蒸蟹先放紫蘇葉，然後將蟹身反轉，蟹蓋朝下以免漏油。因蟹一遇熱，掙扎就會甩腳，所以一定要綁實才蒸。水滾蒸蟹，如5兩蟹，約用大火隔水蒸18-20分鐘，所有蟹都要平放不能疊起。師傅建議使用電飯煲，可以保存水份，效果亦不錯。

保存篇

放入雪櫃內用濕毛巾包好，要不時換毛巾保持濕潤，大約3至4日內一定要食用。如拆蟹粉，先將蟹蒸熟再取蟹粉，用薑、酒煮一煮，除了有辟腥作用，亦可以存放更久。

嗚謝：城景國際樂雅軒中菜廳