啟德呢排有好多賽事同表演，Nicole都嚟睇咗一、兩場，咁睇比賽又或者睇Show前後有咩係最重要呢？梗係醫肚啦！今次就跟Nicole去啟德搵食～
呢間新派日式餐廳係由米芝蓮星級團隊主理，入到嚟空間夠晒闊落，開揚嘅平台座位仲對住比賽埸地，可以高空俯瞰現場環境𠻹，啱晒一班朋友嚟開餐。
裝潢風格年輕時尚
平台座位對住比賽埸地
特色香脆小食
呢度嘅午市定食有齊湯品、小食、主菜同埋甜品，小食可以揀兩款，想特別啲就推介名古屋土雞餃子配洋蔥薑酸醋汁，同埋有少少港式Fusion嘅花生醬鹹蛋黃金沙單骨雞翼。餃子嘅皮好薄，煎到脆脆哋，餡料厚肉結實，蘸埋酸酸哋嘅洋蔥汁，開胃又解油膩感。單骨雞翼外皮炸得非常香脆，第一啖咬落去首先食到花生醬味道，配埋鹹蛋黃好香口！
小食選擇：名古屋土雞餃子配洋蔥薑酸醋汁、花生醬鹹蛋黃金沙單骨雞翼
小食選擇：火炙三文魚配蓀味酸汁
主菜多達7款選擇
主菜可以揀定食、手工薄餅、Burger或麵食，其中大麥味噌春雞定食有兩隻雞髀，一睇就知係啖啖肉啦～雞肉燒得好嫩滑，配埋細蔥同帶有香料味嘅醬汁，食落更加香濃。
主菜選擇：大麥味噌春雞定食
主菜選擇：瑪格麗塔手工薄餅
主菜選擇：巨大福袋烏冬
甜品方面，Nicole推介焗香甜蕃薯配雲呢拿雪糕！呢幾年日本都幾流行食蕃薯類甜品，但係雪糕同蕃薯分開上又好少見喎！蕃薯表面有焦糖，脆脆哋；而雲呢拿雪糕嘅雲呢拿味勁香濃，睇到有埋雲呢拿籽喺入面，超好食啊～
焗香甜蕃薯配雲尼拿雪糕
餓虎藏龍 
地址: 香港九龍城啟德承啟道38-39號啟德體育園運動健康中心4樓WC-401號舖
想食泰國菜都唔一定要出返去九龍城嘅，呢度有間加入Fusion元素嘅泰國菜餐廳，今年春天仲推出咗新晚市套餐！
全新晚市套餐
打頭陣嘅三色前菜拼盤有米紙卷同埋兩款沙律，柚子蝦沙律幾fresh，但加咗少少炸魚仔，鹹鹹香香有啲反差。至於燒茄子鮮蝦肉碎沙律味道相對濃啲，入口有少少酸辣，好有泰式風味。
三色前菜拼盤
柚子蝦沙律、燒茄子鮮蝦肉碎沙律
講到泰式湯品就諗起冬蔭功同酸辣湯？今次餐廳提供其他選擇畀大家～泰式椰子雞湯味道清甜又可以暖吓胃，湯料仲有椰子肉，好加分，啱晒唔係好鍾意重口味嘅人。另外仲有松露油蘑菇湯，係另一種清香湯款。
泰式椰子雞湯
松露油蘑菇湯
特色主菜
街頭風味烤雞即叫即燒，上枱時仲熱辣辣㗎。雞肉醃得夠入味，香茅味突出，而特調酸汁幾解膩，食多幾件都唔會滯。
街頭風味烤雞
平時薑黃飯多數配串燒或豬手，今次轉menu就配烤肉眼扒，感覺即刻升級咗！薑黃飯粒粒分明，仲意外地有鑊氣𠻹，有啲似中式嘅「炒底」，而牛扒就走西式風格，完全體現呢間餐廳嘅Fusion特色。
烤肉眼扒配薑黃飯
泰國菜梗係食芒果糯米飯畫上句號啦，配埋椰子雪糕盡顯東南亞風味𠻹。雖然而家唔係芒果當造季節，但食落都幾甜，正呀！
芒果糯米飯配椰子雪糕
泰式凍奶茶/Greyhound特色凍檸茶/泰式凍咖啡
Greyhound Café (啟德零售館2)
地址: 香港九龍城啟德承啟道38-39號啟德體育園啟德零售館2 1樓M2-112號舖
主持：Nicole
文：Cathy
相：Michael
片：Yan Yan
