【新店直擊】爭咩丫，溝埋黎做fusion！全新Juhn加州風味印度菜

2015-11-26

美國加州嘅陽光與海灘同印度孟買嘅美食大纜都扯唔埋？Juhu Beach Club大廚Preeti Mistry話No！仲話會推出一系列清新又健康嘅現代印度小食...咁即係點？

講多無謂，食嘢最實際。係加州時令有機食材同孟買街頭小食嘅撞擊之下，誕生咗以下Juhu Beach Club嘅招牌菜：

Bombay Sandwich孟買特色三文治，係加州大受歡迎，全靠用烤紅菜頭同醃洋蔥配上芫荽酸辣醬，加埋最近大熱軟綿綿嘅溶芝士。配埋碗新鮮番茄湯，又真係感覺幾Refreshing。

另外印度特色迷你漢堡Pav就從印度小食sliders改良而成，每日出爐麵包加入新鮮疏菜餡料。另外Bhel Salad特選多種優質蔬果，再加配以甜酸醬同炸米粒，味道同口感一齊Upgrade！

畫龍點睛嘅係餐廳用嘅所有香料和甜酸醬都係自家磨製調配，難怪資深名廚Anthony Bourdain形容大廚Preeti嘅菜式絕對係只此一家，明哂！

餐廳開係蘇豪區，有嘢食之餘當然要有嘢飲。酒吧提供多款玩味雞尾酒，以薑、芫荽、羅望子同印度香料等炮製，創新好玩。亦有黎自美國同印度嘅手工啤酒同加州紅酒。唔飲得酒嘅話，就可以試下佢地嘅印度香料奶茶Masala Chai，或者酸酸地鹹鹹地嘅特色Sassy Lassi。

餐廳預計於12月開幕，裝修會以舒適休閒為主，期待呢個新蘇豪區熱點！

地址：香港中環伊利近街28號
電話：(852) 2177 3544 / 2177 3944
Facebook: www.facebook.com/JuhuBeachClubHK

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。