【持續更新】2025素食地圖 6間麵店/摩登中菜/印度菜/Fine Dining/咖啡店推介
2025-02-21

近年素食潮流興起,亦都唔少朋友新年會食素,今期搵咗各類型嘅素食餐廳畀大家,由中菜、車仔麵、印度菜到cafe都有~


咖啡店篇


日式咖喱蛋包雜菜飯 素心事

圖: 為食鴨鴨

如果你鍾意靜靜地嘆杯咖啡、食啲健康又有溫度嘅素食,一定要試吓觀塘呢間蛋奶素Cafe~呢度冇肉類、冇素肉,提供蛋奶素同五辛選項,,全部用心製作,講求食材原味。推介轉轉蛋日式咖哩雜菜飯,用蓮藕、蘿蔔、薯仔、茄子同日本蛋配日式咖哩汁,再加上滑蛋轉轉造型,賣相好吸引!另外三骰丼、日本仔炒麵同日式醬燒豆腐串都值得一試~甜品方面必試焦糖燉蛋,燉得奶滑香濃,焦糖層薄脆啱啱好,食落口感似雪糕咁,好驚喜!整間店細細但好舒服,裝修有復古唱片牆,又播住懷舊金曲,好啱一個人放空或者同朋友傾偈。


誠意素食Cafe 幸福咖啡

圖: MayLam1009

裝潢走天然原木風,白色加淺木色調,簡約得嚟又好有溫度,連牆上掛鐘都可以自選句子,打卡又療癒,真係名副其實咁令人「幸福」。佢哋有好多創意素食選擇,人氣之選包括枝竹蛋漢堡,用枝竹炒成滑蛋感覺,加埋蕃茄、生菜、沙律醬夾喺脆皮麵包中間,再配蕃薯條同新鮮沙律菜,夠哂飽肚又健康。仲有唔同嘅壽司選擇,如芒果泡菜壽司同牛油果天貝壽司等。叫咖啡仲可以印上你鍾意嘅字句,充滿心思;甜品方面,推介佢哋自家煲嘅芋頭西米露,香濃得嚟唔會過甜。


純素咖啡店 悅素

圖: Caroline S

餐廳主打創意純素菜式,連芝士、乳酪都係用植物性材料製作,口感細膩得嚟唔失風味。人氣菜式包括天貝牛油果漢堡配薯條,天貝炸過但一啲都唔油,冇豆味,加埋滑滑嘅茄子一齊咬落去好有層次;滷水五寶飯就更有驚喜,五寶包括普寧豆腐、麵腸、木耳、雞髀菇及花生,全部用滷水汁浸足幾個鐘,夠晒入味,想食得更輕盈,飯底仲可以轉做菜底,食多啲菜都冇負擔。生機檸檬撻刨上新鮮檸檬皮,酸香撲鼻,另有密椒薯仔天貝粒、農夫芝寶等等,全部都好高質素。


必試黑椒天貝漢堡 OVO CAFE 

圖: tamceci530

隱藏喺活化後嘅灣仔舊街市入面,餐廳就好似一個被綠意包圍嘅小森林原木長桌、盆栽牆、滿室鮮花同高挑樓底,啱晒打卡之餘又夠chill。主打健康精緻嘅西式素食,連平時唔食素嘅人都會覺得有驚喜!晚市Dinner Set已經包晒餐湯、沙律、小食、主菜同飲品,金黃南瓜湯奶油感爆登,火龍果+芒果雜果沙律配和風醬就最啱夏天開胃。小食推介鹽酥素雞髀,外脆內嫩,腐皮包住雞髀菇,真係幾亂真!主菜方面日式咖喱吉列素豬扒飯香辣帶甜,素豬扒炸得啱啱好;飲品甜品方面選擇都幾有心思,冷泡伯爵茶解膩又醒神,朱古力心太軟配雲呢拿雪糕簡直邪惡代表。仲有朱古力香蕉西多士、紫薯甘栗餅,樣靚又好味。

中學素食米線 GOAT NOODLE

圖:餐廳(IG)

人氣日式餐廳「悄悄食堂」接手做中文大學嘅素食餐廳,主打素食米線真係形象大轉變喎~新店店名「Goat」除咗代表中大山城上嘅羊,仲暗藏佢哋嘅目標「Greatest Of All Time」,希望做到香港最好食嘅素米線!餐廳現時供應菇菌、麻辣、酸辣、番茄濃湯4款湯底,同埋桂林拌米線,自選餸料($5起/款)就有竹笙、植物肉炸醬、素餃子等等,最平配1個餸只係$32碗。當中番茄湯底用新鮮番茄、炒至焦糖化嘅洋蔥,以及大量日本羅臼昆布熬製,標榜鮮甜無味精;而桂林拌米線會加入自製滷水汁同自製麻辣醬,拌勻脆花生、芫荽、酸筍等配料,開胃又惹味。

 

素食車仔麵 天天素食

圖:Gourmet_hk

人氣素食品牌,主打齋滷味、點心同甜品等,今次特別推出車仔麵,新穎又吸引。車仔麵可以自選三款餸菜,超過30種選擇,包括傳統招牌滷味,如酸齋、豉油齋、煙燻鵝、齋鴨同特製叉燒;仲有黃金菇、午餐肉、紫豆卷等煎炸類,甚至蛋奶素餸嘅貢丸、仙台丸、素切雞等,款式多到令人眼花繚亂!推介煙燻鵝帶有淡淡煙燻香;午餐肉有咬口,完全唔粉。湯底方面提供五款選擇,包括清湯到沙嗲湯、酸辣菜湯、鮮番茄湯同大醬豆漿湯,總有一款啱你。


咕嚕猴頭菇+素食片皮鴨 緻素坊

圖:leopard2012

以傳統中菜烹調手法融合摩登元素嘅素食餐廳,主打精緻又創新嘅中式素食菜式,每道菜都充滿心思,用料講究,真係素食愛好者嘅必試之選!招牌緻素坊片皮鴨用炸腐皮取代烤鴨皮,酥脆香口,咬落仲帶有少少油香,完全模仿到真鴨皮嘅質感。而鴨肉部分就用炸猴頭菇代替,外脆內嫩,纖維分明,口感逼真。咕嚕猴頭菇保持一貫高水準,外層薄脆鬆化,酸甜糖醋醬同菠蘿搭配得宜。另有蜜汁叉燒、川式擔擔淮山麵以及金箔棗蓉糕都值得一試。


素食Fine Dining

圖:Nei bb

中環嘅素食fine dining餐廳,將傳統中菜與創新元素完美結合,為素食帶嚟全新體驗。餐廳主打精緻擺盤同細膩嘅烹調手法,無論係味道、質感或視覺效果都令人耳目一新。其中Tasting Menu嘅12道菜都極具創意,包含餐前小食、前菜、湯品、主菜、清新小點同甜品,啱晒想食好啲嘅素食人士。


高質印度素菜 Kailash Parbat 

圖:ngkuowai

充滿印度風情嘅素食餐廳,每道菜式都結合地道印度風味同香港人口味。Kp Chaat Platter係一個冷盤小食拼盤,以番石榴、乳酪同黃色脆米(Bhel Puri)為主,酸酸甜甜嘅味道非常開胃。Garlic Naan薄薄脆脆,蒜蓉味香濃,搭配醬汁或者單食都非常出色。主菜方面Cheese Butter Masala係改良版嘅Butter Chicken,將雞肉換成濃郁芝士醬汁,番茄味同芝士味完美融合,配埋Naan或者Bhatura都好正!Mango Lassi係必點嘅經典印度奶昔,濃郁嘅芒果味加上乳酪,甜而不膩。


精緻素食cafe JAJA   

ImZeroHo

香港藝術中心內一間充滿藝術感同少女心嘅素食餐廳,整間餐廳以粉紅色為主題,配以乾花、椰樹同可愛動物裝飾,畀人一種置身童話世界嘅感覺。唔單只環境靚,食物賣相同味道亦同樣令人驚喜,絕對係影相同聚會嘅好地方。特別推介提生糙米壽司拼盤,有脆辣菠蘿蜜卷、燒茄子卷同金針菇黑松露脆卷,糙米嘅口感豐富,再配埋脆脆提升層次,味道出色又飽肚;煙燻粟米條好似BBQ燒粟米咁香,外層烤得脆脆,內裡保持濕潤juicy,非常有驚喜。甜品方面奇亞籽布丁(熱帶奇蹟)配上新鮮芒果、脆片同軟滑布甸,清新又滋味。



Yanica、Cathy


最後更新日期:2025年7月6日



关键字
素食
車仔麵
中菜
印度菜
開飯專題
開飯仔為你提供各類型最新飲食情報及優惠,全面照顧你的飲食喜好。
餐厅资料
更多
收起
本月热门
持續更新! 2025生日優惠餐飲精選 送多款免費餐點
2025-07-02
2025掃街地圖 港九新界26間小店推介 (持續更新!)
6天前
【持續更新】慳錢上班族 23間港島/九龍/新界區抵食飯堂推介
2025-06-19
開心果甜品合集 法式可麗餅/牛角包/巴斯克蛋糕/麻糬/糖水
2025-06-30
香港點心店推介!海鮮主題/手剁豬肉燒賣皇/親民價蟹粉小籠包
2025-06-19