【國際新食力】捷克廚師包餃子賣點心歐洲街頭捕獲港式點心車

2016-02-22

你有幾耐冇去過酒樓食點心？你又去過邊間酒樓而家仲有點心車推嚟推去？係，而家想食咩點心，喺張點心紙上面一目了然，畫幾畫就嗌晒，係好方便，但係就冇咗中式酒樓嘅特色囉。以前啲點心車每架得幾款點心，推嚟推去，喺各枱之間穿插。每次架車一推到嚟，就會即刻望下個牌有咩點心，阿姐又可能會打開一兩籠畀你望望，睇啱嘅就拎，睇唔啱嘅就等下架，心急嘅就主動出擊拎住張卡周圍野生捕獲想要嘅點心……

圖：Vinárna Bokovka、Škola Vaření
估唔到香港嘅特色喺香港慢慢消失嘅時候，喺捷克就有個廚師將呢個特色傳開去。呢個廚師喺2月19、20號，喺捷克首都布拉格度搞咗個「點心車」活動，喺街頭擺咗架流動美食點心車，即整即賣。

圖：Škola Vaření

圖：Vinárna Bokovka、Škola Vaření

圖：Vinárna Bokovka、Škola Vaření
賣嘅點心包括有唔同餡（豬肉、鴨肉、雞肉等等）嘅餃子、馬拉糕、燒賣之類，啲廚師雖然全部都係外國人嚟，但係包起餃子上嚟都真係有板有眼㗎，而食客仲會用筷子夾添！成件事好amazing！

圖：Vinárna Bokovka

圖：Tomáš Babinec / Tamarind Tree
佢哋仲將點心融入西方飲食文化，你見到嗰杯金黃色嘅飲料唔係茶，係酒嚟㗎！「飲啖酒食個包」又真係未試過喎，幾特別。呢個活動未完㗎，佢哋嚟緊下個月仲會繼續去唔同餐廳宣揚點心文化㗎！嗚，好感動，喺捷克嘅香港朋友，記得要試下呢個屬於香港、屬於我哋嘅集體回憶味道呀！又，如果香港都可以保留到呢種文化就好喇！

活動網址

隨時接收最新資訊
讚好OpenRice專頁！

開飯專題

開飯仔為你提供各類型最新飲食情報及優惠，全面照顧你的飲食喜好。

【國際新食力】捷克廚師包餃子賣點心 歐洲街頭捕獲港式點心車

【國際新食力】捷克廚師包餃子賣點心歐洲街頭捕獲港式點心車