Sadaharu's Profile

大時大節自然想食好啲，2人餐$698，飲品第二杯半價，網上訂座有85折，值得一試，但未必再有下次。所有前菜不過不失｜刺身食得出係靚嘢，厚切大大塊吞拿魚｜大壞蛋味道好淡，用嚟點薯條冇乜味｜啤酒蝦啲蝦幾新鮮，都爽口彈牙，但又未至於好想再食一次。主菜叫咗西班牙海鮮炒飯，佢係加咗日本元素嘅點綴，返上面po相魚卵，用料有誠意，不過風味似係日本Ressotto多啲，冇西班牙炒飯嗰種惹味，同埋食落有啲漏，成個飯比較濕飲品係抹茶拿鐵麻糬，麻糬好食。甜品最出色係柚子雪葩配棉花糖，柚子雪葩似係自家製，味道酸酸甜甜又好香，配上煙煙韌韌燒到外表燒香嘅棉花糖，配搭出奇和諧。…Read More

晚市有一人套餐，$108/$118包炒時菜/小食拼盤+主菜+餐飲，同埋兩粒朱古力雪糕，咁啱又無人等位，坐得舒服。喺星期六晚上可以食到，好滿足。老闆人超好，服務貼心，知我地想食多啲菜但又想試下小食拼盤，最後話會比大碟啲菜我哋😍雖然係套餐包埋，但一啲都唔馬虎，菜係蒜蓉炒白菜同菜心，小食拼盤有蝦多士、沙嗲串燒同炸丸，非常豐富❤️主菜我哋叫咗雙味雞翼撈麵同招牌喇沙。雞翼好貼心咁剪做單骨雞翼，分別有南乳同香茅味，炸得好香脆。最喜出望外係佢嘅喇沙湯，香濃椰香帶絲絲蝦味，夠晒豐富惹味，連我平時唔太喜歡喇沙都忍唔住不停飲個湯😋絕對值得再訪😃…Read More

經OpenRice平台訂座，鳴虎啟岸分店，訂了8pm, 落好大雨，但因為book咗，照去，去到職員話今晚比人包咗場，我地無得食。我地當下呆咗，我話要投訴，因為你地包咗場唔早講，落大雨成身濕晒行咗10分鐘嚟先話無得食。跟住個職員見我好不滿，又轉口吻話老闆話可以比我地食，真係不知所謂，唔知仲以為去百年難得一遇嘅米芝連蓮餐廳，要老闆皇恩浩蕩先食到。買咗啲咩其實包場係冇問題，咁但係首先喺OpenRice唔好俾人訂位，同埋職員本身就有責任每晚檢查下訂座情況，可以睇到呢間所謂嘅餐廳服務好有問題，所以對佢哋嘅嘢食都唔會有信心😒…Read More

難得有餐廳主打用本地食材，心思思好耐想試，終於比我早三星期book到。一去到門口，呀部長好醉心如「煲電話粥」。點解我會知？因為聽佢傾計嘅對話同語氣，絕唔係同客人對答，似同女朋友咁款。我企喺門口，佢無望過我同理過我，等咗2-3分鐘，先有裡面啲侍應行過見到我。唔係酒樓應有嘅服務態度。食物一般，招牌雞啲肉偏un同埋層皮好厚，可能我偏愛食淋肉啲，同埋唔鍾意咁厚皮，唔太識欣賞。其他菜式不過不失，唯獨蛋白炒飯炒得好，炒到粒粒分明，可以添食。啲侍應都係趕人走feel，無問我地仲食唔食野就陸續收晒我哋啲餐具，差在未收埋枱布。不過佢中途有自動幫我地換碟，隻碟仲要係暖，哩個位加分。到埋單走果陣，部長都係好忙咁企喺到做吉祥物，見啲客走都唔識講句「多謝晒」/「再見」。其他做細嘅更加唔會，上面果件都咁嘅樣，下面啲人又會好服務得去邊。加上哩間餐廳本身都好難book，好唔休做，都無緣再食。…Read More

已經係第二次幫襯哩間蛋糕小店。全間小店蛋糕都係老闆娘整，同埋老闆娘個人都幾和藹。今次試咗哩個最多人食嘅原味斯巴克蛋糕，食落有香濃芝士味，做到果種上下層厚實，中層芝士濃郁棉滑嘅質地又唔會有陣死甜味。切餅款細細件$35，價錢實惠，4吋蛋糕都係$90，我見ig store啲小店一個4吋都要$200，哩間野真係好抵食/又啱晒想食蛋糕但又怕肥嘅女仔👍🏻另外仲有伯爵紅茶、焙茶等口味，可以下次再試！建議如果可以出減脂或者減糖口味，可能會更好！…Read More

口痕，想搵啲價錢合理既小食，哩間野絕對可以滿足到我😍難我見到有我最中二食既韭菜餃，即刻要試下！韭菜餃個皮炸到好酥脆，表層仲撒咗啲孜然粉，幾有心思。咬落去都好多韭菜，幾足料，味道又唔會太咸。而家即叫即炸，聽講佢地啲餃子仲要係自家製，好加分！熱辣辣既燒賣，係冬天既comfort food! 配埋貼豉油同埋辣椒油，正😃而且店員都既配盒裸買，我拎個食物盒比佢，就會自動幫我裝，唔會覺得我阻到佢，抵讚！唯一有少少可以改善既係啲嘢食味精多咗少少，我食完之後好口渴😅…Read More

唔知係咩原因，點解啲服務態度咁差，特別係企門口紮馬尾，裝束似經理嘅女士，可惜睇唔到名牌，如果唔係會直接打上佢哋公司投訴😵可能因為我哋用app訂枱有半價，覺得我哋係乞兒😂所以果位女經理由接待我哋入座，到我哋走嗰陣都係無service可言，零greetings，我哋走嗰陣，行過佢身邊，佢淨係同另一個同事喺度傾偈打牙鉸，正常見到客人走應該講聲拜拜，呢啲係第一日出嚟做嘢都應該會識嘅基本工作態度。🥲請尊重自己嘅職業🥲食物上枱嘅時候，感覺到啲侍應好Green，正常應該會講一句慢用、或者講一講個菜式名，佢地都無。到埋單嗰陣，都係多謝都冇聲。可能係因為上層管理出現問題，導致對下屬嘅培訓都不足，上梁不正下梁歪，所以成間餐廳嘅態度都係不知所謂。唔知道係咪呢間連鎖餐廳嘅風格，我幾年前去海港城嗰間分店食，啲侍應態度又係好差。佢哋咁嘅價錢，同埋中規中矩嘅食物質素，我喺太古城有更加多選擇，所以唔會再幫襯😩…Read More

幫襯左呢間小店已經好幾年，質素仍然可以keep到咁好！每次都係食咖喱蛋包飯，30幾蚊包埋杯凍飲，咁嘅質素，仲有咩可以投訴🤣啲蛋好滑，可以完完全全包住啲飯同埋雞柳，再加埋個咖喱汁，味道啱啱好，每一啖都可以食到咁多樣材料同埋味道，有層次感，味道又夠豐富😋😋😋飲品就冇咩特別，真係純粹為咗解渴，同埋你食完成個飯都真係好需要飲啲嘢！不過小店環境好細，客人要係喺後行食，隔離就係坑渠，同埋會見到啲人喺後行洗緊啲雞柳🤣成件事係好raw既，但又唔係真係咁污糟。如果介意嘅話，就建議買外賣返屋企食～…Read More

我不嬲都係韭菜餃既fans，成日經過哩間野都聞到好香韭菜味，所以諗住試下，點知原來咁伏。上湯韭菜餃：如圖睇到咁樣，成隻餃都係韭菜，只係食到零零星星、好少、超級少好似肉既質感既物體，但肉眼睇幾乎睇唔到有肉，唔知仲以為自己買左素餃。食落去就好似一pat厚麵粉包住啲韭菜，食到我想嘔。而且賣得一啲都唔算平，廿幾蚊得果幾隻，真心唔抵。生菜魚肉：我都明白生意難做，唔會間間都同你真材實料用魚肉黎整，但都唔好咁垃圾啦！食啲魚肉好似食緊膠咁，人地就話係將啲魚肉打到起膠，佢就係真係煮左舊膠比你！啲湯好奇怪，好甜，可能啲糖落得太重手，差少少就以為自己食緊糖水。唯一最正常可能係啲生菜~…Read More

因為用app訂枱有半價優惠，網上食評又唔錯，所以去試下，點知都係中伏。鹽燒牛舌：真係搞唔掂，先唔好講好唔好味，我未食過咁un既牛舌，真係咬唔開，焗住要成舊放入口咀嚼先吞到，真係好差，因為就算出去食放題，再cheap既放題，啲牛舌都唔會un到咁。至於味道，已經un到都唔記得了，而且鹽燒個味本身好難整得好難食，係燒既時候要啲技巧吧~味噌牛油拉麵：睇到人地啲食評講到幾好食，咩啲牛油同個湯溶埋一齊，成個湯好濃郁，令我好期待。點知完全唔係果回事，真係比左一舊牛油，但牛油味唔香濃，就算將佢同湯溶埋一齊，都唔夠濃，甚至有啲淡口。但拉麵既其中一個吸引人既地方唔係就係要個湯夠香濃咩，所以真係令我有啲失望。豬骨拉麵：男朋友叫既，我試過個湯，比我果個濃味，尚可。不過食到一半發現條黑色長髮，真心好噁心。無論一間餐廳幾好食，都唔應該犯哩種低級錯誤，仲要果個時候得我地兩個客，斷估唔會忙中有錯吧，仲要係日本餐廳，更何況啲野食咁既質素....樓面個叔叔幾好人，服務態唔錯，可惜食物水準同衛生欠佳，廚房啲員工應該要再培訓下。…Read More

之前食過佢地即叫即整既芝士蝦棗，一試難忘。外層酥脆，裡面啖啖芝士同蝦肉，果陣食唔晒打包返到屋企宵夜仲咁好食，可惜今次去到已經賣晒，唯有試其他野食。糖心蛋：好香酒味，加上甜甜既軟心蛋黃，幾好食。滷水墨魚：哩到既滷水最出名，每次黎都一定要食。墨魚滷得好入味，又唔會過咸或者帶苦，個味岩岩好，啲墨魚又唔會好老好un。滷水腩肉飯：有滷汁送飯好開胃，啲腩肉肥瘦適中又滷得入味。不過，我就唔太鍾意腩肉陣豬除太濃列，如果解決埋哩個問題就100分喇。炸蠔餅：即叫即炸好有誠意，味道尚可，炸粉太多，下次唔會再試哩個。服務態度好，特別係負責近門口果邊枱既短髮阿姐，就算幾忙(食食下有兩班廿人既大陸客衝左入黎)都保持親切有禮同工作效率，抵讚！…Read More

咁岩同男朋友經過，又想食啲有湯既熱食，見到餐牌又唔貴所以就入嚟試一試。是日優惠$1甜薯：雖然知道係一蚊，唔會有咩期望，但係佢哋連翻熱都冇，就咁樣凍上，令我哋有啲O嘴。芝士吉列豬扒湯烏冬：賣相唔錯，但炸粉比較厚，不過一分錢一分貨，湯烏冬熱辣辣食都令人幾滿足，仲要有埋中華沙律做配菜，都算幾似樣。海膽魚生飯：幾十蚊就有魚生食，仲要擺碟幾靚又夠豐富，唔可以要求有幾新鮮，有幾鮮甜，但係勝在餐牌有嘅材料佢都有比足又夠飽肚，都ok!日式炸餃子：餃子炸得好脆好香口，不過食落裏面有啲乾。醬燒鯖魚：甜甜地好普通冇咩特別。乳酸特飲及蘋果特飲：前者好淡冇咩味。後者好普通，中規中矩。環境坐得幾舒服，出邊仲要有自助湯同沙律吧，真係包你食到飽。如果對食唔係好有要求，其實係一間唔錯又實惠嘅飯堂。…Read More

太早食晚飯，仍然意猶未盡，而成個杏花邨商場都裝修緊，所以淨係識得黎哩間野到搵甜品食。我地叫左客伯爵茶流心多士，切開都ok流心，不過覺得Beans既流心多士更加外脆內流。而經理亦到好緊張走黎問我地夠唔夠流心，想聽下客人意見，都幾有heart嘅。同時亦到叫左客流心芝士釀雞翼，因為睇餐牌相真係影得好惹味。雞翼既賣相真係燒得幾金黃，不過食落唔夠香脆。同埋咬落芝士唔夠香濃又唔夠惹味，實屬普通。可能要去第二間分店試下會唔會整得好香口啲。…Read More

第一次黎食既時候係趁住情人節，諗住邊有情侶會咁唔浪漫同人搭枱慶祝，點知最後都要排20分鐘以上。第二次黎食果陣都不例外要大排長龍。不過佢既招牌韮菜真係好岩我心水。大大隻餃子包住香濃韮菜，雖然餃子皮有啲厚，但係一咬落去裡面咁多汁，又咁足料，所以仍然令我好滿意。至於湯底，店家好有誠意用左野葛菜煲生魚豬骨湯，同行朋友超鍾意，但我就略厭清淡，但勝在性價比高，+$10就可以加一個麵底，最岩小資港女。可惜座位好逼，唔岩三五知己吹水，食就就想快啲走。…Read More

同男朋友行完街，經過意粉屋見到出左夏日海鮮餐，所以一於入去試下，估唔到連鎖西餐廳性價比幾高，值得推介！羽衣甘藍帶子湯：真係有兩粒彈牙帶子，湯好creamy，有濃濃既甘筍香，配埋上面綠色blend好既羽衣甘藍，香濃得黎又清新。芝士蟹肉釀有機大啡菇：我男朋友非常歡喜既一道前菜，有機大啡菇非常厚肉多汁，而釀喺大啡菇上面既芝士亦焗得好香好惹味，配埋大啡菇一齊食好夾，啲芝士仲可以拉絲添。不就唔係好食到啲蟹肉，不過以哩個價錢都算係咁。香煎紐西蘭龍脷配薯菜：大大條龍脷上枱，夠晒金黃香脆。旁邊碟牛油檸檬汁最有驚喜，香濃得黎又帶點酸微微，沾薯條最正，檸檬又夠夏日，夠點題。西西利帶子馬蘇里拉芝士紐紋粉：非常清新既香草味，哩隻紐紋粉喺出面亦好少食到，帶子夠大粒彈牙。不過我地都係食慣紅白汁意粉隻味多啲~…Read More