Dada choices的個人專頁

位於ICC 101樓嘅新開麻辣火鍋店！一行入去就感受到好豪華嘅裝修😹應該主打商務客～整體食物質素符合預期，但主要都係去食個景，可以對住270度維港海景打邊爐，真係超靚！🥰。手切牛肉吊龍用聖旨盤上碟，好有氣派，好有打卡feel🤣啲肉都好嫩～淥大嘅8-10秒就食得，但就算煮耐咗都完全唔使擔心會韌！（因為我一開始揾唔返嚿肉所以淥咗好耐😂，但都仍然好好食，所以實證左唔會韌）。海鮮拼盤有象拔蚌、帶子、鮑魚、蟶子皇、生蠔，全部都大大件，而且感覺都好新鮮，唔會腥。東星斑 又係一個好浮誇嘅擺盤！用魚片砌到成個摩天輪咁🎡肉質偏結實，魚肉片有細骨，小朋友同長者可能都要注意一下～。烽火戲豬喉 / 冰川鵝腸 呢兩樣都係平時香港打邊爐比較少見嘅食物，兩個嘅口感都有啲相似，都係好脆好爽口😆，本身擔心呢類型嘅食物會有一浸內臟味，但食落都唔太覺～。特色紅糖冰粉口感清涼爽滑，而且佢本身係唔甜，主要甜味來自面頭嘅少量果乾～同埋有少少花生碎增加口感，是好適合嘅清爽解膩之選！概括一下，其實呢類型火鍋主要都係超濃味湯底同埋調味料😂，所以食材嘅味道唔係太明顯、但都食得出口感係唔錯嘅！有得唱K又有靚景，都可以一試！…查看更多

星期日去食午餐，有Sunday Jazz Brunch嘅套餐（$788/person)～餐廳位於尖沙咀喜來登酒店內，入面環境都好靚，窗口位置可以望到維港景色🏙️而且仲有駐唱歌手繹演jazz嘅歌曲，氣氛都唔錯👍不過枱同枱之間都距離都有少少近🙈店員非常親切而且helpful!值得讚下🫶🏻。洋蔥包每一枱都有嘅餐前小食，網上見到好多人都勁推介，果然名不虛傳！非常大隻，外脆內軟，見到入面層次分明，而且有好香嘅洋蔥味，配上佢哋自家嘅牛油好好食。但記得要節制唔好食太多，如果唔係就食唔落後面嘅菜式😂。Pan Seared Foie Gras 香煎鵝肝配蘋果醬有兩大嚿鵝肝🤤外層煎到脆脆地，好似焦糖嘅口感，入面唔算好滑好creamy，但感覺冇咁油膩～蘋果醬味道唔錯，甜甜地可以配埋鵝肝中和下。Lobster Bisque 龍蝦湯餐廳嘅staff會喺你面前將啲湯倒落碟，非常熱辣辣～有真材實料嘅龍蝦，食落肉質新鮮結實🦞，而個湯本身都好濃味（甚至有啲鹹XD）另外佢係好稠嘅湯嚟，好快就會因為凍咗而稠到變咗啫喱狀咁><所以要飲快少少🤏🏻。42oz Bone-in Prime Rib 帶骨燒牛肉配辣根牛肉汁份量超級多！我哋兩個人食，食咗一半已經好飽🤣揀咗medium rare，可以食到嚿肉比較真實嘅質素～牛味好濃！另外會配辣根牛肉汁～平時都唔常見，質地係泥狀，味道都幾濃，有啲wasabi嘅感覺(?)😂，都幾惹味。Parmesan & Truffle Fries 芝士松露炸薯條 ｜ Truffled Cream Corn 黑松露忌廉粟米兩個配菜都好出色，薯條係幼薯，熱辣辣又好脆，調味適中，食到停唔到口嘅感覺🤣忌廉粟米好好食😋！！個人力推！啲粟米甜甜哋，食落好creamy而又唔會覺得膩。Morton's Legendary Hot Chocolate Cake 莫爾頓經典焗暖心朱古力餅（二人份）比想像中大份，而且個雪糕都好大方，俾咗好大球🤣個朱古力餅嘅外層微脆，質地似實淨嘅muffin，而唔係蛋糕嗰種，入面係軟心朱古力醬，但未至於流心～味道都好甜好好食😋。2-hour Free Flow Package Alcoholic (HK$460)| Non-Alcoholic (HK$198)另外可以加配兩小時飲品free flow！本身諗住嗌non-alcoholic free flow，但見到佢一杯mocktail 先$70，又唔想夾硬飲3杯😂所以最後都係單嗌就算～…查看更多

🍽️ Flames燴牛面香草蕃茄醬牛肉汁扁意粉 $108lunch set 嘅其中一個選項～價錢包咗一杯汽水或茶，另外都仲有好多小食可以跟餐加配（可以參考menu最下方）～我覺得呢個意粉都幾有驚喜！燴牛面份量都好多，本身以為係細細粒咁上，估唔到係有兩至三大嚿！口感好腍、又軟熟😍都幾高質，扁意粉都唔錯，煮嘅時間啱啱好，牛肉汁嘅味道正常，唔會太鹹👍🏻整體都值得食！黑松露薯條 +$48另外都加咗小食同朋友share,份量合理，但唔係好脆，黑松露份量都唔係好多🥲感覺係喺整好咗嘅薯條上面加pat松露就算，所以唔係條條都有松露，而且都只有好淡嘅黑松露味，覺得用$48加配唔係好抵, 所以下次應該唔會加了~…查看更多

呢間非常推薦！！同屋企人食放題，星期日午市開始前門口已經排晒長龍，雖然舖頭好大，但係都全場坐滿，想食嘅話最好book定位先！食物主要用手機落單，而飲品/甜品/少量食物，就可以喺出面自助拎。食物種類同選擇超多！以下精選一啲我覺得必嗌嘅嘢！。刺身超厚又大件，而且質素好好，感覺新鮮。試咗幾款，刺身最推薦係三文魚、極尚大赤蝦。。特色料理花雕醉鮑魚 - 好爽口！完全唔會韌，酒味都適中唔會太濃，小朋友都接受到，而且size都唔失禮，有驚喜藍莓醬蘋果鵝肝 - 佢哋嘅招牌菜之一！鵝肝好大嚿，入口即溶，配埋蘋果好清新，令人有種高級嘅感覺😂完全睇唔出係放題會食到嘅菜式。天婦羅／燒物甜番薯天婦羅 - 熱辣辣，好甜，外面好脆，入面綿密軟熟香草燒羊鞍 - 調味料好多，勁大香草味，有啲黑椒嘅惹味，冇羊騷臭，肉質都有驚喜，好易咬，唔韌唔老，燒得唔錯。一品料理呢個系列好多都好驚喜，又估唔到可以喺放題食到嘅嘢！全部都係回本之選XD厚切鵝肝多士 - 外層係炸過，所以好脆，入面就係好creamy嘅鵝肝，口感有層次！而個多士好有牛油味，而且都好脆，加埋好夾金湯燴花膠 - 唔知個湯係點做到金黃色，啲花膠雖然薄，但都好大片！海燕窩椰汁燉木瓜 - 作為甜品非常好，有椰汁同燕窩，感覺滋補，暖暖哋咁食落覺得好舒服😌女士們最愛！。甜品超多唔同雪糕雪條揀！有至少4個唔同牌子嘅各個口味～包括Häagen-Dazs、Dreyer's，而且仲有而家大熱嘅笨nana!!不過大家記住食到一半就要攞咗先xd如果唔係有機會最尾冇晒款揀…查看更多

。淺炸挪威三文魚撈通粉 $118 （連飲品自助吧）三文魚炸得好脆，份量都唔少～不過我覺得椒鹽落得比較多，有啲搶味😅通粉就好特別，應該係蛋黃醬mix蟹子，味道唔錯！但上碟時已經係凍嘅，凍到我懷疑佢係咪本身就設計成凍食🥶。花生芝麻牛奶麻糬 +$68（跟餐）超級推薦！牛奶麻糬好香奶味，口感軟糯得嚟又唔會黐牙～配埋花生芝麻香氣十足😋。飲品自助吧有五款茶飲，每日款式唔同。我呢日有四款係水果茶，同埋無糖嘅炭燒烏龍茶。個人推薦蘋果微碳酸，味道微甜，而且有少少氣，感覺好清新！📍 觀塘巧明街99號地下11號舖人均消費：$100-$200推介指數：⭐️⭐️⭐️⭐️其他美食👉🏻 #cada_觀塘…查看更多

位於銅鑼灣嘅老字號上海嘢！感覺非常之有香港特色，但食物質素普通，除咗豆漿之外唔使特登試。另外如果食嘅話都要留意淨係收現金🙌🏻。豆漿 $11👍🏻有凍熱、無糖選擇，非常出色，飲落好香豆味，而且磨汁好滑，飲到底有好少好少豆渣，真材實料嘅證明！。上海粢飯 $29見到入嚟有七成嘅客都係食粢飯～佢係傳統嘅粢飯，入面有肉鬆榨菜油炸鬼，啲糯米飯做得唔錯，粒粒分明，唔會一pat嘢咁，而且飯嘅份量啱啱好夠包住啲餸。不過油炸鬼好淋，失望。小籠飽 $45／5隻外皮偏厚，明顯食到一嚿粉咁。入面嘅湯汁唔算好多，豬肉餡料份量同味道都Ok。酸辣湯 $30好濃味，酸同辣兩隻味都好明顯，但係又平衡到，內有筍、蛋花、木耳絲、豆腐和豬紅。。蒸銀絲卷 $23唔係周圍有得食啦，味道就好似饅頭咁，不過仲會入面明顯見到一層層嘅層次，但食到中間就感覺有啲實心，配埋煉奶，滿足感max!。蔥油餅 $11好厚實，超過1cm厚，鹹鹹地，面頭灑滿芝麻，非常飽肚…查看更多

同屋企人去食自助餐，週末午市全場滿座，但所有食物都refill得好快，而且收碟同事都好積極快手，值得一讚最受歡迎一定係凍海鮮區，生蠔長腳蟹呢啲都好多人拎。生蠔比想像中大隻，冇臭腥味，長腳蟹超級大隻蟹腳！回本之選甜品選擇唔少，最招牌應該係心太軟，超級流心，而且無限畫碟，寫張紙仔俾佢就會幫你整，慶祝生日或者紀念日都好適合。另外個人推薦焦糖燉蛋都好出色。平時我對熱食無咩期望，但佢竟然有20幾款，包括龍蝦仔🦞試咗幾款味道都唔錯，幾有心機！…查看更多

。慢烤雞腿蛋吐司 $49舖頭嘅招牌食品！真係好好食，雞肉又厚又嫩滑，而且個醬都好好食，甜甜哋好開胃！蛋汁超流心，一咬就爆曬出嚟，一定要好小心慢慢食先唔會整污糟件衫😂雖然要下午茶時間先有得食，但我願意為咗佢晏啲食飯XD真係好高質，必食！。芝士火腿肉鬆蛋餅 $49比想像中大份好多！好有驚喜😆，蛋餅皮煎到微焦香，咬咬有少少煙韌～芝士火腿肉鬆呢個配搭都好隱陣！而且啲餸都俾得好多，芝士又識拉絲，口感同味道都好好。。甜不辣（3大塊） $38我本身都好鍾意食甜不辣，平時一份都係切開曬嘅小塊，而呢間每塊都有手掌咁大！而且都好有咬口，配埋泰式辣醬好夾👍🏻。冬瓜茶 +$9平時餐廳好多冬瓜茶對我嚟講都好甜，而呢個本身已經標明少甜，飲落味道清新，配埋主食都好夾，唔會死甜！但佢個膠膜真係好難開😹！！！一定要用筷子再快狠準先開到！總體表現都好唔錯！會再encore👍🏻…查看更多

享樂嘅 Bagel 不嬲都出名好食～今次都係一貫水準，煙煙韌韌咁，非常出色！今次仲特登試咗唔同嘅翻熱方法，結果都有驚喜，分享俾大家參考下😛。開心果麻糬貝果入面係開心果醬＋少量開心果粒，味道唔算超濃郁，但甜度啱啱好，加埋麻糬之後口感更豐富🥹我選擇咗蒸熱嚟食，成個包變得更濕潤軟熟，煙靭感更突出！。大甲芋泥貝果一直都係佢哋嘅人氣款！芋泥又香又滑，重點係超足料～每一啖都食到芋泥😍呢隻就用焗爐加熱：噴濕表面後焗5分鐘，外層會有輕微脆皮感，口感更有層次！✨總結：兩種翻熱方法都 keep 到 bagel 嘅水準～個人更加偏好焗爐加熱，因為鍾意脆面！而且唔使開爐比較方便。如果鍾意軟熟嘅口感，就建議蒸熱！…查看更多

之前聽同事介紹過，終於有機會過來食！14:00左右去到，都要等10-15分鐘試咗佢哋嘅麻酸辣湯底（微辣）～麻味夠、酸味足，飲落開胃之餘唔會辣到好辛苦！最驚喜係落咗好多芫茜，湯底夠足料👌🏻配料方面揀咗豆卜同黃金墨魚餅～豆卜吸晒湯汁，非常入味😋魚餅都幾彈牙！另外見到有食評話食完呢間唔會生暗瘡，暫時我食咗兩日又真係冇喎😆（再觀察多幾日先可以下定論哈哈）…查看更多

。沙翁 $9/隻呢隻沙翁真係超級大隻，大過我拳頭😂一拎上手已經聞到陣陣蛋香～外層微脆，入面係濕潤軟熟嘅口感，係好食嘅沙翁！依家喺街見到嘅傳統小食越嚟越少，有緣遇到都值得買一件試吓！…查看更多

。芋泥肉鬆蛋吐司吐司烘到微脆，時間啱啱好！麵包軟熟，餡料份量都ok～👍 但芋泥唔係想像中咁「泥」，質地反而似芋頭漿🤣味道微甜，不過略略俾肉鬆搶咗fo，食落嘅存在感不大，如果加啲芋頭粒/稠啲會好啲。炸雞塊呢個就真係普通啲……粉漿偏厚，咬落有啲淋，係因為套餐包咗小食先會嗌整體感覺：性價比唔算高，但如果鍾意芋泥肉鬆組合，偶爾食吓都ok…查看更多

。花生糯米糍 $25一盒有六粒，正常size～外皮軟糯得嚟唔會黏口，厚薄度適中，對於鐘意食糯米皮嘅人嚟講，呢個比例非常滿意👏 入面揀咗花生餡，佢仲有啲椰絲，整體甜度唔高。花生碎屬於粗粒嗰類，味唔算好濃，但有啲粗粒口感幾好，唔會太膩～如果鍾意軟糯口感又唔太甜嘅中式小食，呢個都幾值得一試！…查看更多

去到嘅時候 2:30，啱啱好開始下午茶餐！嗌咗照燒雞扒烏冬餐係豬骨湯烏冬，啲烏冬都幾彈牙，質素唔錯！雞扒煎得唔錯，個皮脆脆地，而本身肉質都嫩滑另外仲有炒蛋、麵包同餐飲～個麵包因為同炒蛋&雞扒裝埋一齊，所以吸咗好多油><如果堂食可能會好啲總結：質素一般，但$38 有呢個份量連飲品都算幾抵食！…查看更多

Komeda 咖啡 $39我係平日下午去，咖啡有優惠，可以免費升級大杯裝（x1.5)，仲可以揀牛奶轉豆乳（唔使加錢）👍🏻佢嘅咖啡味道容易入口，唔會好澀。另外仲會有一包花生送，我覺得好脆好好食😋提拉米蘇 $39個蛋糕都大件，啲cream都厚身～食晒嘅話都會覺得有啲膩，而且個蛋糕底都幾厚，整體味道都正常，呢個價錢嚟講幾值得食！現場環境都好好，好啱同朋友慢慢坐低傾吓偈，而且平日人流唔算好多，坐耐啲都唔會有壓力，適合想放慢腳步嘅人去嘆杯咖啡！…查看更多